Pormal nang kinilala bilang isang ganap na drug-free workplace ang Legislative Department ng Lokal na Pamahalaan ng Odiongan matapos itong gawaran ng Philippine Drug Enforcement Agency (PDEA) ng Certificate of Drug-Free Workplace.
Pinangunahan nina PDEA MIMAROPA Assistant Regional Director Irvin John Coderis at Odiongan Vice Mayor Michael Arevalo ang pag-unveil sa nasabing sertipiko na inilagay sa harap ng gusali ng legislative department.
Ayon kay Coderis, mahalaga ang pagkakaroon ng drug-free workplace sa mga tanggapan ng pamahalaan at maging sa pribadong sektor upang matiyak na ligtas sa ilegal na droga ang mga empleyado at mas makapagpokus sila sa kanilang trabaho at serbisyo para sa publiko.
Bago ideklarang drug-free workplace ang legislative department, sinabi ni Vice Mayor Arevalo na isinailalim muna sa surprise drug testing ang lahat ng empleyado ng kanilang tanggapan kabilang ang mga miyembro ng Sangguniang Bayan.
Aniya, mahalagang mapanatiling malinis at ligtas sa ilegal na droga ang kanilang opisina upang mas mapalakas pa ang tiwala ng publiko sa pamahalaan.
Inaasahan naman na susunod sa yapak ng legislative department ang iba pang departamento ng lokal na pamahalaan ng Odiongan bilang bahagi ng kampanya laban sa ilegal na droga.
Sinabi rin ni Coderis na target ng PDEA na makamit ang 100 porsyentong drug-free workplace sa buong MIMAROPA upang masiguro ang ligtas, maayos, at produktibong working environment sa mga tanggapan at establisimyento sa rehiyon.
Hinimok din nina Coderis at Arevalo ang iba pang ahensya ng pamahalaan at pribadong sektor na makiisa sa programa ng PDEA para sa pagsusulong ng drug-free workplaces.
Ang Philippine Drug-Free Workplace Program ay alinsunod sa Republic Act No. 9165 o ang Comprehensive Dangerous Drugs Act of 2002.
Discussion about this post