Pansamantalang isasara sa publiko ang Balinsasayaw Cave sa Barangay Mahabang Baybay, San Agustin, Romblon upang bigyang-daan ang isasagawang Cultural Heritage Mapping, Archaeological Assessment at Cave Assessment sa naturang lugar.
Ito ay alinsunod sa Resolution No. 141-2026 na ipinasa ng Sangguniang Bayan ng San Agustin, na nagtatakda ng pansamantalang pagsasara ng kuweba hanggang sa matapos ang mga nabanggit na pagsusuri at ideklara ng Municipal Government na ligtas at angkop na itong muling buksan sa publiko.
Ayon sa resolusyon, maaaring magdulot ng pagnanakaw o pagkasira ng mga artifact, vandalism, hindi awtorisadong paghuhukay, pagkasira ng mga pormasyon sa kuweba at wildlife ang unrestricted public access habang isinasagawa pa ang mga assessment.
Kinikilala ang Balinsasayaw Cave bilang natural at cultural heritage resource ng San Agustin. Sa loob nito, may mga naitalang narekober na labi ng tao, ataul at iba pang kagamitan na itinuturing na mga bakas ng lumipas na sibilisasyon.
Nagsisilbi rin itong tirahan ng mga paniki at mga ibong balinsasayaw na nagpoprodyus ng guano o gwano, kaya bahagi rin ng layunin ng pagsasara ang pangangalaga sa mga likas na yamang matatagpuan sa loob ng kuweba.
Sa ilalim ng resolusyon, inaatasan ang Barangay Council na may territorial jurisdiction sa Balinsasayaw Cave na magtalaga ng mga barangay tanod o iba pang awtorisadong personnel upang magbantay, mag-monitor at magprotekta sa lugar laban sa hindi awtorisadong pagpasok, vandalism, pagnanakaw, ilegal na paghuhukay at iba pang ilegal na gawain habang umiiral ang temporary closure.
Maglalagay rin ng mga kaukulang warning signs sa lahat ng entry points ng kuweba. Hinihiling naman ang tulong ng mga concerned municipal offices at law enforcement agencies sa pagpapatupad at pag-eenforce ng nasabing resolusyon.
Ipinagbabawal habang sarado ang kuweba ang hindi awtorisadong pagpasok, vandalism, pagnanakaw, ilegal na paghuhukay at iba pang aktibidad na maaaring makapinsala sa mga artifact, archaeological resources, cave formations at wildlife.
Maalalang ipananawagan ng environmentalist na si Rodne Galicha na ma-cordon ang lugar upang maprotektahan ang mga artifact at iba pang yamang pangkultura sa loob ng kuweba. Nagpasalamat din siya kay San Agustin Mayor Aaron James Madrona at Sangguniang Bayan Member Nalden Tan sa agarang pagtugon at mga isinagawang hakbang para sa pangangalaga sa Balinsasayaw Cave.
