Pormal nang binuksan ng Philippine Coast Guard (PCG) ang Coast Guard Mobile Post (CGMP) San Andres sa Barangay Poblacion, San Andres, Romblon noong September 4, 2026 upang palakasin ang presensya nito at mapabilis ang pagtugon sa mga insidente at emergency sa karagatan.
Inaasahang palalakasin ng pagtatatag ng CGMP San Andres ang mga operasyon ng PCG sa lugar, partikular sa maritime safety and security, law enforcement, search and rescue (SAR), at iba pang Coast Guard operations sa kanilang area of responsibility.
Ayon kay PO1 Jun Samaniego ng PCG Odiongan, mahalaga ang matibay na koordinasyon sa pagitan ng Coast Guard at lokal na pamahalaan upang maging mas mabilis ang pagtugon sa mga pangangailangan ng mga residente, lalo na sa mga insidenteng may kinalaman sa kaligtasan sa karagatan.
Nagpasalamat din si Samaniego sa pamunuan ng San Andres sa pangunguna nina Mayor Rovillos at Vice Mayor Ibañez sa suporta nito sa pagkakaroon ng mobile post sa bayan.
Isinagawa ang blessing at inauguration ng bagong Coast Guard Mobile Post sa pangunguna ni Coast Guard Station (CGS) Romblon Commander Lieutenant Junior Grade Eugenio K. Romea II PCG, kasama sina San Andres Mayor Fernald G. Rovillos, Vice Mayor Joel G. Ibañez, at Dr. Arnulfo F. De Luna, Executive Assistant mula sa Office of the Governor at OIC ng PGR Tablas Extension Office.
Bilang keynote speaker, iginiit ni Mayor Rovillos ang buong suporta ng LGU San Andres sa PCG at pinasalamatan ang kanilang patuloy na serbisyo sa komunidad.
Sa pamamagitan ng pagkakaroon ng CGMP sa San Andres at pinaigting na koordinasyon sa pagitan ng PCG, lokal at panlalawigang pamahalaan, inaasahang higit na mapapalakas ang maritime safety, security at emergency response, partikular sa mga baybaying lugar ng bayan.
