Umabot sa 250 estudyante ng Romblon National High School (RNHS) ang lumahok sa isinagawang Crime Prevention Symposium bilang bahagi ng paggunita sa 32nd National Crime Prevention Week (NCPW) sa pangunguna ng Romblon Police Provincial Office (RPPO), katuwang ang pamunuan ng paaralan.
Layunin ng symposium na palakasin ang kamalayan at partisipasyon ng kabataan sa pagpapanatili ng kapayapaan, seguridad at ligtas na komunidad.
Tinalakay ni Atty. Adrian Ducat, NAPOLCOM Provincial Officer for Romblon, ang kahalagahan ng National Crime Prevention Week, gayundin ang mga usapin hinggil sa anti-bullying, school safety at security.
Binigyang-diin niya ang kahalagahan ng civic responsibility, pakikilahok sa komunidad at aktibong pagtutulungan sa mga hakbang para maiwasan ang krimen.
Samantala, tinalakay ni PCPT Andrea Marie Andres, Provincial Legal Officer ng Romblon PPO, ang Anti-Rape Law, kabilang ang kahalagahan ng paggalang sa karapatan ng bawat isa, pag-unawa sa mga legal na pananagutan at pagiging mapagmatyag laban sa mga krimen.
Bahagi rin ng programa ang pagbigkas ng Pledge of Pagtataya ng Mamamayan sa Paghadlang sa Krimen, na pinangunahan ni PLTCOL Ledilyn Ambonan, Chief ng Police Community Affairs and Development Unit (PCADU).
Isinagawa rin ang sabayang pag-ihip ng pito sa ilalim ng “Pito Tayo Laban sa Krimen” Campaign, na sumisimbolo sa sama-samang pangako ng mga estudyante, guro, kapulisan at iba pang sektor ng komunidad na makiisa sa mga hakbang para sa crime prevention.
Binigyang-diin sa aktibidad ang mahalagang papel ng kabataan bilang katuwang sa pagpigil sa krimen at pagtataguyod ng responsableng pagkamamamayan.
Patuloy namang isinusulong ng RPPO ang mga community-based crime prevention program sa pakikipagtulungan sa mga paaralan, ahensya ng pamahalaan at iba pang stakeholders upang palakasin ang pakikiisa ng komunidad sa pagpapanatili ng kapayapaan at kaayusan.
Discussion about this post