Mahigit 2,200 kabahayan sa bayan ng Calatrava ang nakatanggap ng rice subsidy mula sa lokal na pamahalaan bilang tugon sa pagtaas ng presyo ng mga pangunahing bilihin at langis dulot ng krisis sa Middle East.
Ayon kay Calatrava Mayor Robert Fabella, bawat benepisyaryong pamilya ay nakatanggap ng tig-10 kilo ng bigas sa ilalim ng programa na nakatakdang ipatupad ng apat na beses ngayong taon.
“Malaking tulong itong mga bigas na ito para maibsan ang gastusin ng mga residente namin ngayong may krisis,” pahayag ni Fabella.
Ipinaliwanag ng alkalde na kinakailangang nakarehistro ang mga household sa database ng lokal na pamahalaan upang matiyak ang maayos at tamang distribusyon ng ayuda.
Tinatayang aabot sa ₱5 milyon ang inilaan na pondo para sa programa, na nagmula sa Local Government Support Fund (LGSF) na ipinagkaloob ng administrasyon ni Pangulong Ferdinand R. Marcos Jr..
Matatandaang noong Marso ay inatasan ng Pangulo ang mga lokal na pamahalaan na ilaan ang hindi bababa sa 50 porsyento ng kanilang LGSF para sa pagbili ng bigas na ipamamahagi sa mga residente.
Ang LGSF ay isang programa ng pamahalaan na nagbibigay ng direktang pondo sa mga lokal na pamahalaan para sa mga prayoridad na proyekto, kabilang ang imprastraktura, kalusugan, at iba pang serbisyong panlipunan.
Hinikayat naman ni Fabella ang mga residenteng hindi pa nakatanggap ng rice subsidy na makipag-ugnayan sa kanilang barangay upang makapagparehistro.
“Automatic namin silang bibigyan kung hindi sila napasama ngayon, basta magpasa lang sila ng application form na pinatutunayan ng pamahalaang barangay,” dagdag niya.
Ayon sa lokal na pamahalaan, ang pamamahagi ng bigas ay bahagi ng koordinasyon ng pambansa at lokal na pamahalaan upang matulungan ang mga komunidad na maibsan ang epekto ng tumataas na gastusin.
