Binuo ng Romblon Police Provincial Office (RPPO) ang Provincial Advisory Group for Police Transformation and Development (PAGPTD) bilang katuwang ng kapulisan sa pagsusulong ng police transformation at development sa lalawigan.
Isinagawa ang orientation on Rules and Responsibilities at oath-taking ceremony ng mga miyembro ng PAGPTD noong October 8 sa Romblon PPO Multi-Purpose Building sa Barangay Capaclan, Romblon.
Pinangunahan ni PMAJ Chisi F. Faderagao, Acting Chief ng Police Strategy Management Unit (PSMU), ang orientation tungkol sa Terms of Reference at mga tungkulin ng advisory group.
Sinundan ito ng oath-taking ceremony na pinangunahan ni PCOL Rexton F. Sawi, Provincial Director ng Romblon PPO.
Kabilang sa mga napiling miyembro ng Provincial Advisory Group si PIA Romblon Information Center Manager Paul Jaysent Fos.
Matapos ang panunumpa, isinagawa ang pagpili ng mga opisyal ng PAGPTD at open forum bago nagbigay ng mensahe at gabay si Sawi sa mga miyembro ng grupo.
Ayon kay Sawi, mahalaga ang pakikipagtulungan ng mga stakeholder sa police transformation upang matiyak na ang mga programa ng kapulisan ay transparent, responsive at nakaayon sa pangangailangan ng komunidad.
Layunin ng PAGPTD na magsilbing mekanismo para sa pakikipag-ugnayan ng Romblon PPO sa mga ahensya ng pamahalaan, pribadong organisasyon, civil society at iba pang sektor ng komunidad bilang bahagi ng pagpapatupad ng PNP PATROL Plan 2030.
