Isang barangay kapitan mula sa Barangay Tambac, bayan ng Romblon, Romblon ang nasuspinde ng isang buwan at walang matatanggap na sahod matapos mapatunayang nagkasala sa reklamong simple misconduct.
Sa imbestigasyon ng Sangguniang Bayan ng Romblon, napatunayang nagkaroon ng tensyon noong Marso 1 ng kasalukuyang taon nang pilitin ni Kapitan Pablo De Capiz na palabasin sa session hall si Kagawad Walyn Maestre matapos ang mainit na debate hinggil sa mga polisiya ng barangay sa pagbili ng supplies.
Ayon sa resolusyong ipinasa ng Sangguniang Bayan, lumalabas na habang nagtatalo ang dalawa kaugnay sa office supplies, humampas si Kapitan De Capiz ng kamao sa kanyang mesa, sinundan pa ng pag-hampas ng gavel. Gumanti din si Kagawad Maestre at humapas din ng kamao sa kanyang mesa. Sa punto ng diskusyon, idineklarang “Out of Order” si Kagawad Maestre at iniutos ang kanyang paglabas sa tulong ng mga barangay tanod.
Inilahad sa resolusyon na hindi nararapat ang aksyon ng kapitan na nag-utos sa mga tanod na paalisin ang isang halal na opisyal dahil lamang sa inquiry nito. Tinatanong kasi ni Kagawad Maestre kung bakit nangungutang ang kanilang barangay sa supplier ng mga office supplies kahit may pondo sila.
Ayon pa sa Sangguniang Bayan, ang debate kaugnay sa procurement practice ay nagpapakita lamang ng gumaganang deliberative body. Gayunpaman, ang ginawang paghampas ng Kapitan sa mesa gamit ang kanyang kamao ay lubhang lumalayo sa mga pangunahing prinsipyo ng karaniwang parliamentary law.
Bagama't may pagkakamali ang kapitan, naniniwala ang Sangguniang Bayan na hindi intensyon nito na mas palalain pa ang sitwasyon.
