Hinikayat ni Romblon Vice Governor Armando Gutierrez ang mga kooperatiba sa lalawigan na maghanap ng mga grant at bumuo ng malalaking income-generating projects upang higit pang mapalakas ang kanilang operasyon at mapalaki ang benepisyong natatanggap ng kanilang mga miyembro.
Sa kanyang mensahe sa ginanap na ika-20 Ragipunan o Romblon Provincial Cooperative Congress, ibinahagi ni Gutierrez ang isang proyekto ng kooperatiba sa kumpanyang kanyang dating pinagtatrabahuhan kung saan nagbigay ang isang multinational company ng grant para sa isang income-generating project.
Ayon sa kanya, maaaring pag-aralan ng mga kooperatiba sa Romblon ang ganitong uri ng oportunidad at makipag-ugnayan sa malalaking kumpanya upang makakuha ng grant para sa mga proyektong pakikinabangan ng kanilang mga miyembro.
Sinabi ni Gutierrez na hindi lamang dagdag na kita ang maaaring maidulot ng mga ganitong proyekto, dahil maaari rin itong magbigay ng mas murang produkto o serbisyo sa mga miyembro ng kooperatiba.
Ginamit ito ni Gutierrez upang bigyang-diin ang kahalagahan ng training at maayos na pamamahala sa pagpapatakbo ng kooperatiba.
“As long as cooperatives is well managed at tsaka talagang yung mga officers and directors are serious in running this organization. Malayo pa ang mararating ng inyong organization.”
Samantala, tiniyak ni Gutierrez ang patuloy na suporta ng Provincial Government of Romblon sa mga programa ng kooperatiba.
Hinimok din niya ang mga miyembro at opisyal ng kooperatiba na patuloy na sumailalim sa mga pagsasanay upang mapahusay ang kanilang kakayahan sa pamamahala.
Ayon kay Gutierrez, mahalagang mapanatiling maayos ang pamamalakad ng mga kooperatiba upang magpatuloy ang kanilang kontribusyon sa kabuhayan ng mga Romblomanon.
“Sana even the members should also undergo training in terms of how to manage cooperative. Marami pa tayong mga matutunan.”
Sinabi pa niya na maaaring maging susunod na hakbang ng mga kooperatiba ang pagbuo ng mas malalaking proyekto na makapagbibigay ng karagdagang kita at mas malaking benepisyo sa kanilang mga miyembro.
Tuwing Oktubre ay inoobserba ang Cooperative Month.
