Marami ang nagsasabi na hindi biro ang maging pangulo ng bansa dahil sa dami ng problema na kailangan mong harapin. Kaya naman hindi natin masisisi si President Mayor Rodrigo Duterte kung paulit-ulit niyang nababanggit na kung minsan ay pinag-iisipan na niyang magbitiw.
Rewind tayo nang kaunti bago ang pagkapanalo niya noong 2016 elections. Bago ang naturang halalan, ilang beses na nabanggit ng pangulo na wala siyang balak na tumakbong presidente. Sa edad nga naman niyang 70 nang panahong iyon, mas maganda nga naman na nagre-relax na lang siya at ienjoy ang kaniyang buhay na kasama ang pamilya.
Sa tagal na rin niya sa public service, hindi na masama kung nagretiro na siya, o kaya naman ay puwede rin na mabigyan siya ng posisyon na hindi masyadong maproblema at maaari siyang magbakasyon, makapaglibang at maalagaan nang husto ang kaniyang kalusugan.
Pero hindi siya tinantanan ng ibang nagnanais na tumakbong bise presidente, partikular si Alan Peter Cayetano, na kalihim ngayon ng Foreign Affairs department. Kung hindi niya siguro makukumbinsi na tumakbong presidente si Duterte, kakandidato siyang bise presidente nang walang kasamang presidential candidate.
Mahirap nga namang manalo kung “single” ka sa eleksyon. Aba’y ngayon nga sa EDSA, hindi na rin pinapayagang tumakbo ang mga “single” sa sasakyan. Ang kaso, kahit nakumbinsi ni Cayetano na tumakbong presidente si Duterte, olats pa rin siya sa vice presidential race laban kay Leni Robredo.
Ngayon, tila nasasagad na, napapagod at nadidismaya si President Mayor dahil sakabila ng pagsisikap niya na ayusin ang bansa tulad ng pagsugpo sa katiwalian sa gobyerno, krimen at droga, ay patuloy pa rin ang mga ito. Kung tutuusin, hindi naman talaga madaling masugpo ang naturang mga problema dahil deka-dekada nang nandiyan ang mga ‘yan kaya malabong mawala kaagad. Iyong nga lang, nakakadalawang-taon pa lang ang pangulo sa puwesto pero dumadaing na siya sa hirap.
Kahit naman si dating Pangulong Noynoy Aquino noong nanalo ay tila nanibago sa unang mga taon niya sa pamamahala. Gaya ni Duterte, wala rin plano noon si Noynoy na tumakbong presidente pero hiningi iyon ng pagkakataon at ng kaniyang mga “boss” na taong-bayan. At natapos niya ang kaniyang termino at iniwan na mas maganda ang kalagayan ng bansa at ekonomiya kaysa sa inabutan niya.
Ang kaibahan nga lang sa sitwasyon ng dalawa, si Noynoy, maayos ang kalusugan at 50-anyos lang nang tumakbo at nanalong pangulo. Kumpara kay President Mayor na 71-anyos na at aminadong may ilang mga karamdaman gaya ng Barrett’s esophagus, Buerger’s disease, migraine at pananakit ng likod dahil sa aksidente niya sa motorsiklo.
Kaya naman hindi maiwasan ng ating kurimaw na magtanong kung kakayanin pa kaya ng kalusugan at pasensiya ni Duterte ang natitirang apat na taon ng kaniyang termino?
Sa magkahiwalay na pagtitipon sa Malacanang, sinabi ni Duterte na handa siyang magbitiw sa puwesto kung hindi si VP Leni ang papalit sa kaniya. Tingin kasi ng pangulo, hindi kakayanin ni VP ang mga problema ng bayan. Mas gusto raw niya na military junta, o katulad nina Senador Chiz Escudero o dating Sen. Bongbong Marcos ang papalit sa kaniya.
Iyon nga lang, marami ang nakapansin kung bakit hindi nabanggit ni President Mayor si Cayetano sa mga gusto niyang pumalit sa kaniya? Nakalimutan lang kaya niya si Cayetano? O hindi talaga siya bilib sa kaniyang dating VP candidate? O masama ang loob niya kay Kuya Alan dahil kung hindi sa kaniya eh baka nagre-relax lang siya ngayon sa Davao City kasama si Kitty.
Kung nais ng mga tagasuporta ni President Mayor na manatili siya puwesto at hindi magbitiw, aba’y hayaan lang nila sa puwesto si Leni bilang VP. Dahil sa oras na manalo si Marcos sa electoral protest nito laban kay Leni, aba’y si Marcos ang magiging VP at baka totohanin ni Duterte ang pagre-resign. Tiyak na malalaglag ang mga appointee ni Duterte.
Tandaan: Ang tao'y nilalang na politiko at madalas ang politiko'y nanlilinlang ng tao!
(Twitter: follow@dspyrey)
