Ipinaliwanag ng Department of the Interior and Local Government (DILG) MIMAROPA ang paggamit ng ilang parking space sa lugar ng PEGASUS bilang pansamantalang paradahan ng mga sasakyan ng panrehiyong tanggapan nito, kasunod ng mga katanungan kaugnay ng naturang parking arrangement.
Sa inilabas na pahayag, sinabi ng DILG MIMAROPA na nakakuha ito ng pahintulot mula sa PEGASUS na gamitin ang limitadong bahagi ng parking area nito malapit sa tanggapan sa #822 Quezon Avenue, Barangay Paligsahan, Quezon City.
Ayon sa tanggapan, umuupa ito sa isang pribadong gusali na may limitadong espasyo para sa paradahan. Bagama't may parking area sa basement ng gusali, pansamantalang inilalabas ang ilang sasakyan habang oras ng trabaho upang matiyak na madaling magamit ang mga ito kapag kinakailangan sa mga opisyal na gawain at maiwasan ang pagkaantala dahil sa mga sasakyang nakaparada sa basement.
Sa ilalim ng napagkasunduang sistema, ibinabalik at ipinaparada sa basement ng gusali ang mga sasakyan pagsapit ng gabi. Nagpasalamat ang DILG MIMAROPA sa PEGASUS sa pagbibigay ng pahintulot at pakikipagtulungan.
Binigyang-diin ng tanggapan na ang paggamit sa parking area ay para lamang sa lehitimong pangangailangan ng mga opisyal na gawain at hindi para sa pansariling kapakinabangan o anumang layuning hindi naaayon sa tungkulin ng mga kawani ng pamahalaan.
Muli ring iginiit ng DILG MIMAROPA ang kahalagahan ng integridad, pananagutan at wastong paggamit ng mga pasilidad at pribilehiyong ipinagkakaloob sa mga kawani ng pamahalaan. Ayon dito, hindi nito kinukunsinti ang anumang gawaing labag sa batas, umiiral na patakaran o pamantayang etikal sa serbisyo publiko.
Tiniyak ng tanggapan na patuloy nitong gagampanan ang mga tungkulin nito nang may propesyonalismo at pananagutan upang mapanatili ang tiwala ng publiko sa pamahalaan.
