Anim na mangingisda ang inaresto ng Coast Guard Sub-Station (CGSS) Romblon dahil sa umano’y ilegal na pangingisda gamit ang compressor bilang underwater breathing apparatus sa karagatang sakop ng Barangay Logbon, Romblon, Romblon noong October 22.
Ayon sa ulat, naharang ng mga tauhan ng Coast Guard ang motorized banka habang nagsasagawa ng maritime patrol. Inaresto ang anim na sakay nito dahil sa hinihinalang paglabag sa Section 19 ng Municipal Ordinance No. 12-2006, o ang Comprehensive Fishery Ordinance ng Romblon, Romblon.
Dinala sa CGSS Romblon ang mga naaresto para sa kaukulang dokumentasyon, habang ang bangka at mga kagamitang pangisda na may tinatayang kabuuang halagang ₱161,300 ay ipinasa sa Municipal Agriculture Office (MAO) para sa angkop na administratibong aksyon.
Patuloy naman ang Philippine Coast Guard sa pagsasagawa ng maritime patrols at law enforcement operations upang labanan ang ilegal na pangingisda at mapangalagaan ang yamang-dagat ng bansa.
