Ginunita ng lokal na pamahalaan ng Alcantara kasama ang iba’t ibang ahensya ng gobyerno at sektor ng komunidad ang ika-82 anibersaryo ng Battle of Sibuyan Sea nitong Oktubre 24, bilang pag-alala sa makasaysayang labanan noong Ikalawang Digmaang Pandaigdig.
Pinangunahan ni Mayor Riza Galicia-Pamorada ang paggunita kasama si dating alkalde at beteranong sundalo Ramon Galicia, gayundin ang mga kinatawan ng Department of Education (DepEd), Philippine National Police (PNP), Bureau of Fire Protection (BFP), Philippine Coast Guard (PCG), at mga kawani ng lokal na pamahalaan.
Nagsimula ang programa sa isang banal na misa, na sinundan ng walk parade na pinangunahan ng Alcantara National High School Drum and Lyre Corps. Nakiisa rin sa martsa ang mga empleyado ng munisipyo at iba’t ibang sektor ng komunidad.
Sa kanyang talumpati, binigyang-diin ni Mayor Galicia-Pamorada ang kahalagahan ng pag-alala sa mga nag-alay ng buhay para sa kapayapaan at ang pagpapanatili ng kasaysayan para sa susunod na mga henerasyon.
“Ito ay pagbibigay natin ng respeto, pagmamahal sa mga naunang nakipaglaban para mapanatili ang kapayapaan dito sa atin. At mapalad tayo dahil sa kanila, in-enjoy po natin kung ano man ang dulot ng kapayapaan natin ngayon,” ani Galicia-Pamorada.
Nanawagan din siya na ipagpatuloy ang paggunita sa makasaysayang pangyayari.
Ayon kay Municipal Tourism Officer Andrew Dalisay, sadyang ginawang simple at solemne ang programa alinsunod sa mga protocol para sa paggunita ng mga makasaysayang pangyayari na natutuhan nila sa pagsasanay ng National Historical Commission of the Philippines (NHCP).
Ipinaliwanag niyang layunin ng ganitong pamamaraan na gawing makabuluhan ang paggunita habang pinapalawak ang kaalaman ng publiko tungkol sa kasaysayan. Plano rin ng lokal na pamahalaan na palakasin ang pagpapalaganap ng impormasyon sa mga paaralan at maghanda ng mas malawak na pagdiriwang sa mga susunod na taon.
Samantala, ikinuwento ni Galicia kung paano napunta sa Alcantara ang pagdaraos ng paggunita sa Battle of Sibuyan Sea.
Ayon sa dating alkalde, nagkaroon ng pagkakataon ang mga lokal na pamahalaan na magpahayag kung sino ang nais magdaos ng paggunita sa makasaysayang labanan. Siya ang nag-alok na tanggapin ito sa Alcantara.
“Tinanggap ko sa bayan ng Alcantara ang Battle of Sibuyan Sea,” ani Galicia, na nagsilbi nang 21 taon sa Philippine Army.
Ibinahagi rin niya ang kanyang karanasan bilang sundalo at ang panata niya matapos masugatan sa isang operasyong militar sa Sulu. Aniya, nangako siyang magpapatuloy sa paglilingkod kung mabibigyan pa siya ng pagkakataon.
Nanawagan din si Galicia sa mga kabataan na alamin at pahalagahan ang kasaysayan ng Battle of Sibuyan Sea, na aniya ay may mahalagang papel sa naging takbo ng Ikalawang Digmaang Pandaigdig sa Pilipinas.
Ayon sa mga tala ng Naval History and Heritage Command, naganap ang Battle of Sibuyan Sea noong Oktubre 24, 1944 bilang bahagi ng Battle of Leyte Gulf. Sa labanan, inatake ng mga eroplanong pandigma ng Estados Unidos ang puwersang pandagat ng Japan, na nagresulta sa paglubog ng battleship na Musashi at pagkasira ng iba pang barkong pandigma.
Nakatayo sa Alcantara ang landmark na nakalaan sa paggunita ng Battle of Sibuyan Sea, na kinikilala ng NHCP. Ayon sa lokal na pamahalaan, patuloy nitong isusulong ang pagpapalaganap ng kaalaman sa kasaysayan upang mapanatili ang alaala ng labanan at ang mga aral nito para sa mga susunod na henerasyon.
Sa bahagi ng programa, pinasalamatan din ni Galicia-Pamorada sina Sangguniang Bayan Member Larkie Martino at ang grupong Alpha Phi Omega sa pagtulong sa paglilinis at pagpipintura sa paligid ng landmark.


























