Sugatan ang isang 48-anyos na lalaki matapos magbanggaan ang dalawang motorsiklo sa National Road sa Barangay Tumingad, Odiongan, Romblon, bandang alas-8:15 ng gabi noong Sabado, Oktubre 24.
Ayon sa paunang imbestigasyon ng Odiongan Municipal Police Station (MPS), minamaneho ng biktima, isang residente ng Barangay Panique, ang itim na Suzuki Raider patungong Barangay Batiano nang bumangga ito sa isang asul na Rusi Macho na may sidecar.
Ang ikalawang motorsiklo ay minamaneho naman ng isang 48-anyos na barangay tanod at residente ng Barangay Tumingad, na umano’y papasok sa national road mula sa isang tindahan sa gilid ng kalsada.
Batay sa paunang imbestigasyon, hindi umano napansin ng driver ng motorsiklong may sidecar ang paparating na Suzuki Raider habang tumatawid patungo sa kabilang lane, na naging sanhi ng banggaan.
Nagtamo ng mga pinsala sa iba’t ibang bahagi ng katawan, partikular sa ulo, ang driver ng Suzuki Raider. Agad siyang isinugod ng mga rumespondeng tauhan ng Municipal Disaster Risk Reduction and Management Office (MDRRMO) sa Romblon Provincial Hospital para sa pagpapagamot.
Hindi naman nasaktan ang driver ng ikalawang motorsiklo.
Dinala sa Odiongan MPS ang dalawang motorsiklo para sa dokumentasyon at kaukulang disposisyon habang nagpapatuloy ang pagproseso sa insidente.
