Pormal nang binuksan ng Philippine Science High School–MIMAROPA Region Campus (PSHS-MRC) ang Academic Building II sa pamamagitan ng isang seremonya ng pagbabasbas noong Oktubre 15, kasabay ng pagdiriwang ng ika-10 anibersaryo ng campus.
Sa kaniyang mensahe, binigyang-diin ni Campus Director Romeo Ongpoy Jr. ang mga hamon at tagumpay sa pagkumpleto ng gusali. Inaasahan niyang magsisilbi itong sentro ng inobasyon at paghahanda sa mga susunod na siyentista ng bansa.
Ipinahayag naman ni Grade 9 scholar Mc Lawrence Castillo ang kaniyang pananabik na magamit ang bagong pasilidad, partikular ang mas malawak na silid-aklatan.
May apat na palapag at roof deck ang Academic Building II. Kabilang sa mga pasilidad nito ang mga silid-aralan, tanggapan, faculty room, discussion area, pinalawak na silid-aklatan, at mga silid para sa Design and Engineering at Technology and Innovation.
Nasa unang palapag ang mga tanggapan ng CID, Student Services Division (SSD), FAD, Campus Director, at ang silid-aklatan. May tig-aanim na silid-aralan naman sa ikalawa at ikatlong palapag, habang may lounge at discussion room sa basement. (with reports from Zach Andrean Fortu of PUSOR)
