Umabot sa 120 households mula sa Indigenous People (IP) community sa Barangay Pinamihagan, San Jose ang napagkalooban ng iba't ibang serbisyo at tulong ng Romblon State University (RSU) sa isinagawang community outreach activity noong September 1, 2026.
Pinangunahan ng RSU Advocacy Office ang buong araw na aktibidad sa ilalim ng University Community Empowerment through Sustainable Social Services (UniCESSS) Program, isang flagship community engagement program ng unibersidad na naglalayong tugunan ang pangangailangan ng mga vulnerable communities sa pamamagitan ng magkakaugnay na serbisyong panlipunan.
Tinatayang 200 katao ang lumahok sa aktibidad na binubuo ng mga personnel ng RSU, lokal na pamahalaan, national government agencies at civic organizations.
Kabilang sa mga isinagawang aktibidad ang Volunteerism Orientation, Gender and Development (GAD) at Family Empowerment Session, oral hygiene session para sa mga bata, livelihood training, medical mission, at pamamahagi ng rice bags at school kits.
Sa ilalim ng programa, nakatanggap ang mga benepisyaryo ng 120 bag ng limang-kilogram na bigas at 120 school kits.
Nakatanggap din ang komunidad ng 76 pares ng tsinelas mula sa Rotary Club of Manila Binondo Prime at karagdagang 39 pares mula sa National Service Training Program (NSTP).
Nagkaloob naman ang Provincial Health Office (PHO) Romblon ng 50 oral hygiene kits para sa mga bata.
Samantala, nagsagawa ang Medical Mission Committee na pinamumunuan ng RSU Health Services Office (HSO) ng 66 medical consultations. Namahagi rin ng mga gamot sa mga pasyente batay sa available na suplay, kabilang ang mga basic medicines na donasyon ng Rotary Club.
Para naman sa mga adult members ng komunidad, nagsagawa ang Technical Education and Skills Development Authority (TESDA) ng livelihood training upang madagdagan ang kanilang kaalaman at kakayahan para sa pagkakakitaan.
Nagkaroon din ng hiwalay na oral hygiene session para sa mga bata sa pakikipagtulungan ng Rural Health Unit ng San Jose.
Tinalakay naman sa GAD at Family Empowerment Session ang gender equality, shared family responsibilities, positive parenting at kamalayan tungkol sa violence against women and children (VAWC).
Naging pagkakataon din ang sesyon upang ipakilala sa komunidad ang Project PAG-IBIG at ang mga serbisyong iniaalok ng RSU Family Empowerment Center.
Isinagawa ang outreach sa pamamagitan ng pagtutulungan ng iba't ibang tanggapan ng RSU, kabilang ang Office of the President, Advocacy Office, Special Projects, Aesthetics and Groundscape Office (SPAGSO), Volunteerism Unit, GAD Office, HSO, Extension and Community Engagement Support Office (ESCEO), International Relations Office (IRO), at RSU Sta. Fe at RSU San Jose campuses.
Katuwang din ng unibersidad ang mga opisyal ng Barangay Pinamihagan, San Jose Municipal Government sa pangunguna ni Mayor Ronie Samson at Sangguniang Bayan Member Joseph Del Mundo, Municipal Police Station, PHO Romblon, Municipal Health Office at TESDA.
Dumalo rin mismo sa outreach si Rotary Club of Manila Binondo Prime Impact Creating President Vilma Morato-Lim kasama ang anim na kapwa miyembro ng kanilang club bilang isa sa mga sponsors ng aktibidad.
Matapos ang programa, nakipagdiyalogo ang top management ng RSU sa mga community leaders. Pinangunahan ito nina University President Dr. Merian Catajay-Mani, VPAA Dr. Emelyn Montoya at VPAF Dr. Tomas Faminial.
Binigyang-diin sa closing dialogue ang patuloy na commitment ng unibersidad na palawakin ang extension work para sa mga vulnerable at underserved communities sa lalawigan.
Ayon sa Advocacy Office, lumampas sa orihinal na itinakdang bilang ang mga donasyong natanggap, dahilan upang makapagpaabot pa ang RSU at mga katuwang nito ng tulong lampas sa unang target na bilang ng beneficiaries.
Tinanggap naman ng mga opisyal ng barangay at munisipyo ang outreach bilang pagpapatuloy ng partnership sa pagitan ng lokal na pamahalaan at RSU, partikular sa pagtugon sa mga pangangailangan ng komunidad sa kalusugan, edukasyon at kapakanan ng pamilya.
Sa pamamagitan ng UniCESSS, patuloy na isinasalin ng RSU ang mga programa nito sa research at extension tungo sa konkretong serbisyo para sa mga komunidad na nakararanas ng kakulangan sa pagkain, serbisyong pangkalusugan at iba pang pangunahing social services. (PR)
Discussion about this post