Aabot sa 23,879 mahihirap na pamilya sa lalawigan ng Romblon ang nakatakdang makatanggap ng tig-10 kilo ng bigas sa tatlong magkakahiwalay na pamamahagi ngayong Oktubre, Nobyembre at Disyembre sa ilalim ng Local Government Support Fund (LGSF) ng administrasyon ni Pangulong Ferdinand Marcos Jr.
Ayon kay Gov. Trina Firmalo-Fabic, naglaan ang pambansang pamahalaan ng ₱46 milyon para sa programa, na nakabatay sa datos ng Community-Based Monitoring System (CBMS) upang matukoy ang mga kwalipikadong benepisyaryo.
Batay sa datos ng CBMS, 23,879 mahihirap na sambahayan ang naitala sa lalawigan mula sa humigit-kumulang 75,000 kabuuang sambahayan.
Una umanong nagkasya ang paunang pondo para sa humigit-kumulang 21,000 pamilya, kaya nagdagdag ng pondo ang pamahalaang panlalawigan upang matustusan ang kulang na mahigit 5,000 sako ng bigas. Ayon sa gobernador, nais sana niyang mapalawak ang saklaw ng tulong upang maisama ang lahat ng pamilya sa lalawigan, ngunit kailangang sundin ang mga alituntunin ng pambansang pamahalaan sa paggamit ng pondo.
Nakatakdang simulan ang pamamahagi ngayong linggo sa mga bayan ng San Jose at Corcuera, habang susundan ito sa susunod na linggo sa mga bayan sa Tablas Island, Romblon Island at Sibuyan Island.
