Umabot sa 392 estudyante sa Romblon ang naitalang biktima ng bullying sa School Year 2023–2024, batay sa datos na inilatag ng Department of Education (DepEd) MIMAROPA sa 3rd Quarter Development Administration Committee (DAC) Meeting noong Agosto 6.
Sa ulat ng Philippine Information Agency MIMAROPA, batay sa datos na nakalap hanggang Hunyo 9, kabilang ang Romblon sa mga Schools Division Office (SDO) sa MIMAROPA na may daan-daang naitalang biktima ng bullying.
Pinakamarami ang naitala sa Palawan na may 1,026 biktima, kasunod ang Oriental Mindoro na may 905, Occidental Mindoro na may 734, Puerto Princesa City na may 460, at Romblon na may 392.
Mas mababa naman ang naitala sa Marinduque na may 152 biktima at Calapan City na may 80.
Sa lahat ng school divisions sa rehiyon, lumabas na physical bullying ang pinakakaraniwang uri ng bullying na naitatala.
Sa kabuuan, umabot sa 9,243 Learner Rights and Protection (LRP) concerns ang naitala sa buong MIMAROPA. Pinakamarami rito ang mga kaso ng bullying na may 3,845 kaso o 41.6 porsiyento ng kabuuang bilang.
Sinundan ito ng Children At Risk (CAR) na may 2,983 kaso, iba pang LRP concerns na may 1,489, child abuse na may 556, at Children in Conflict with the Law (CICL) na may 370 kaso.
Bilang tugon sa mga insidenteng may kinalaman sa kaligtasan at proteksyon ng mga mag-aaral, sinabi ng DepEd MIMAROPA na nagpapatupad ito ng mga localized anti-bullying policies at mga hakbang laban sa hazing at fraternity at sorority-related activities.
Kabilang din sa mga ipinatutupad na hakbang ang information at awareness campaigns, advocacy at social mobilization, gayundin ang mga standard operating procedures, interventions, monitoring at reporting mechanisms sa mga paaralan.
Layunin ng mga hakbang na mapalakas ang kaligtasan ng mga mag-aaral at matiyak ang mas maayos na pagtugon sa mga insidenteng may kaugnayan sa bullying at iba pang usapin sa learner rights and protection.
