Nabigo ang panukala ni Konsehal Miguel Montojo na isapubliko sa pamamagitan ng livestream sa social media ang mga regular na sesyon ng Sangguniang Bayan ng Romblon matapos itong hindi makakuha ng sapat na boto mula sa mga miyembro ng konseho.
Sa botohan ng 10 konsehal, tatlo lamang ang pumabor sa panukala, apat ang tumutol, habang tatlo ang nag-abstain o hindi bumoto, dahilan upang hindi ito maaprubahan.
Layunin sana ng panukala na mabigyan ng mas malawak na access ang publiko sa mga talakayan at desisyong ginagawa sa loob ng konseho, bilang hakbang sa pagpapalakas ng transparency at pananagutan ng lokal na pamahalaan.
Ayon kay Konsehal Montojo, bagama’t hindi pumasa ang panukala, hindi pa rito nagtatapos ang kanyang adbokasiya. Sinabi niyang hihingi siya ng suporta mula sa mga barangay at sa publiko upang muling maisulong ang naturang panukala.
Samantala, nagpahayag ng pagkadismaya si Konsehal Lyndon Molino, isa sa mga bumoto pabor sa livestream ng mga sesyon. Aniya, sayang ang pagkakataong maisulong ang mas bukás na pamamahala sa lokal na antas.
“Ito sana ay isang makabuluhang hakbang tungo sa higit na transparency sa lokal na pamahalaan at sa pagpapalakas ng partisipasyon ng mamamayan sa mga usaping pampubliko. Matagal na nating isinusulong ang bukás at tapat na pamahalaan bilang isang pangunahing plataporma,” pahayag ni Molino.
