Iginiit ni Senadora Risa Hontiveros na dapat ibatay sa tunay na pangangailangan ng mga Pilipino, at hindi sa personal na koneksiyon o rekomendasyon, ang pamamahagi ng ayuda sa ilalim ng Assistance to Individuals in Crisis Situation (AICS) ng Department of Social Welfare and Development (DSWD).
Inihayag ito ni Hontiveros sa pagtalakay sa panukalang 2027 budget ng DSWD, kung saan binigyang-diin niya na dapat manatiling maaasahang sandigan ng mga indibidwal at pamilyang dumaranas ng krisis ang programa.
Nanawagan din ang senadora ng mas mahigpit na mga mekanismo upang maiwasan ang dobleng pagtanggap ng ayuda at matiyak na napupunta ang pondo sa mga kuwalipikadong benepisyaryo.
Gayunman, iginiit niyang hindi dapat maging hadlang ang digitalization sa pagkuha ng tulong, lalo na para sa mga walang bank account o cellphone, may limitadong internet access, o kulang ang mga dokumento at rekord.
Ayon sa paninindigan ng senadora, kailangang mapanatili ang pagiging madaling ma-access ng AICS upang hindi mapagkaitan ng tulong ang mga tunay na nangangailangan dahil lamang sa kawalan ng teknolohiya o personal na koneksiyon.
Layunin ng AICS na magbigay ng pansamantalang tulong sa mga indibidwal at pamilyang nahaharap sa krisis, kabilang ang mga gastusing medikal, pambili ng pagkain, transportasyon at iba pang agarang pangangailangan, alinsunod sa umiiral na mga patakaran ng DSWD.
