Nag-alok si Department of the Interior and Local Government (DILG) Secretary Jonvic Remulla ng ₱50 milyong pabuya para sa sinumang makapagbibigay ng impormasyong hahantong sa pagkakaaresto kay Sen. Ronald “Bato” dela Rosa, na patuloy na hindi natatagpuan ng mga awtoridad.
Sa isang press conference noong Biyernes, Oktubre 23, sinabi ni Remulla na naibigay na kay Dela Rosa ang nararapat na konsiderasyon bilang senador, ngunit nananatili umano itong nagtatago.
“We have given him all the courtesy that could be afforded as a senator of the Republic of the Philippines, but he has shown nothing but cowardice by going into and remaining in hiding,” ani Remulla.
Ayon pa sa kalihim, napagkamalan umano ni Dela Rosa na tanda ng kahinaan ang kanyang naunang pagtatangkang makipagnegosasyon para sa mapayapang pagsuko ng senador.“It’s time for the gloves to come off.
It’s time to bring justice to his victims,” dagdag ni Remulla.
Inihayag din ng kalihim na ituturing nang “armed and dangerous” ang senador at maglalaan ng ₱50 milyon bilang pabuya para sa kanyang pagkakadakip. Iniulat na magmumula ang pondo sa intelligence funds ng DILG at Philippine National Police (PNP).
Nahaharap si Dela Rosa sa warrant of arrest na inilabas ng International Criminal Court (ICC) kaugnay ng mga kasong crimes against humanity na may kaugnayan sa mga pagpatay sa ilalim ng kampanya kontra droga ng administrasyon ni dating Pangulong Rodrigo Duterte. Itinatanggi nina Duterte at Dela Rosa ang mga paratang laban sa kanila.
Samantala, bumuo ang mga awtoridad ng task force na nakatuon sa pagtunton at pag-aresto sa senador. Binigyan din siya ng PNP ng isang linggo upang kusang sumuko, habang sinabing magpapatuloy ang operasyon upang maipatupad ang warrant.
