Magkakaroon ng karagdagang singil sa kuryente ang mga consumers ng Romblon Electric Cooperative (ROMELCO) simula ngayong Oktubre kasunod ng pag-apruba ng Energy Regulatory Commission (ERC) sa dagdag-singil ng National Power Corporation (NAPOCOR).
Ayon sa abiso ng ROMELCO, ₱0.0634 o 6.34 sentimos kada kilowatt-hour (kWh) ang idadagdag sa bayarin ng mga konsumer dahil sa pagtaas ng Universal Charge for Missionary Electrification (UC-ME).
Noong Setyembre, nasa ₱11.8800 kada kWh ang residential electricity rate ng ROMELCO para sa mga bayan ng Romblon, Concepcion at Banton. Gayunman, hindi ito nangangahulugang ang kabuuang residential rate sa Oktubre ay awtomatikong magiging ₱11.9434 kada kWh dahil maaari ring magbago ang iba pang bahagi ng singil sa kuryente.
Sa pahayag ng NAPOCOR noong Oktubre 3, kinumpirma nitong inaprubahan ng ERC ang pagtaas ng UC-ME mula ₱0.2763 kada kWh patungong ₱0.3397 kada kWh. Ipatutupad ang bagong rate sa loob ng tatlong taon simula Oktubre 2026.
Ayon kay ROMELCO General Manager Rene Fajilagutan, makatutulong ang dagdag-singil upang matiyak ang tuloy-tuloy na subsidiya para sa operasyon ng NAPOCOR at mapanatiling abot-kaya ang halaga ng kuryente para sa mga konsumer sa off-grid areas.
“This additional increase of UCME will benefit the off-grid consumers as this will insure the UCME Subsidy provide for the operation of NPC & NPC will be sustainable and the SAGR will remain affordable to the off-grid consumers,” ani Fajilagutan.
Ipinaliwanag din niya na ipapataw ang dagdag-singil sa mga konsumer ng kuryente sa buong bansa, kabilang ang mga nasa sakop ng Manila Electric Company (Meralco), iba pang electric utilities, at mga electric cooperative sa mga pangunahing power grid.
Ang UC-ME ay ginagamit upang tustusan ang subsidiya sa suplay ng kuryente sa mga missionary at off-grid na lugar kung saan mas mataas ang gastos sa paglikha ng kuryente dahil sa limitadong koneksiyon sa pangunahing power grid at paggamit ng mga generator na pinatatakbo ng fuel.
Nagmula ang adjustment sa resolusyon ng ERC kaugnay ng mga rate filing ng NAPOCOR na matagal nang nakabinbin. Nagresulta ito sa pagpapanumbalik ng ₱23.52 bilyong halaga ng mga gastusing dati nang hindi pinayagang mabawi.
Ayon sa NAPOCOR, makatutulong ang pagbawi sa mga gastusing ito upang mapanatili ang operasyon ng mga planta nito at ng mga katuwang na power provider sa malalayong komunidad.
Batay sa dagdag na ₱0.0634 kada kWh, ang konsumer na gumagamit ng 100 kWh ay magkakaroon ng karagdagang ₱6.34 sa bill; ₱12.68 para sa 200 kWh; ₱19.02 para sa 300 kWh; at ₱31.70 para sa 500 kWh.
