Pormal nang nanumpa si re-elected Senator Lito Lapid para sa kanyang bagong mandato sa Senado sa isang payak na seremonya na ginanap nitong Sabado, Mayo 25, sa kanyang bayan sa Porac, Pampanga.
Sa harap ng kanyang kapatid na si Kapitan Arturo M. Lapid, Punong Barangay ng Poblacion, Porac, isinagawa ang panunumpa ng senador, na sinaksihan din ng kanyang mga mahal sa buhay.
Ito na ang ika-apat na termino ni Lapid sa Senado mula nang unang mahalal noong 2004.
Nagpahayag ng pasasalamat si Sen. Lapid sa mahigit 13 milyong Pilipino na bumoto at muling nagtiwala sa kanyang kakayahang maglingkod.
“Dahil sa patuloy nilang pagmamahal ay papalitan ko rin po ito ng pagmamahal at malinis na pagseserbisyo. Gagawa at gagawa ako ng mabuting paraan upang mapagserbisyuhan ang ating mga kababayan, lalo na ang mga mahihirap,” ani Lapid.
Binigyang-diin din niya ang kanyang hangaring ipagpatuloy ang pagsusulong ng mga makabuluhang panukalang batas na direktang makatutulong sa mga kapus-palad na sektor ng lipunan.
