Matagumpay ang isinagawang 70.3 Ironman Philippines sa Puerto Princesa City noong November 13. Ayon kay Princess Galura, Pangulo at General Manager ng Sunrise Events Inc, ang organizer ng palaro, nagpapasalamat siya sa suportang ibinigay ng Pamahalaang Panlungsod ng Puerto Princesa at sa lahat ng mga tumulong para maisakatuparan ang palaro lalung-lalo na sa mga residente na nagbuhos ng tubig sa mga atletang tumatakbo para maibsan ang sobrang init ng araw.
Mahirap aniya magkumpara subalit sa nakuha niya umanong mga komento mula sa mga manonood at partisipante, mas nagustuhan nila ang paglangoy dito kumpara sa ibang lugar na ginanapan ng Ironman dahil sa malinis ang lugar, mayroon ring malapit na pasilidad para sa mga manonood lalo na sa pagkain, palikuran, at sa kaldsada.
“Alam niyo ang daming positive na comment, ito daw ay napakaganda, napaka-festive, yung local community daw nagbubuhos ng tubig alam nyo naman sobrang init diba, apat na araw umuulan, biglang noong karera natin saksakan ng init,” saad niya.
Hindi aniya perpekto at talagang kailangang paunlarin pa subalit sa isang inaugural year ay tila nasapul ang tinatarget na marka. Nagbunga aniya ang kanilang ginawang preparasyon katuwang ang Pamahalaang Panlungsod ng Puerto Princesa, sa katunayan araw-araw silang nagkakausap ni Mayor Lucilo Bayron.
Kinumpirma niya rin na bagamat mayroong ilang atleta na nakaranas ng leg cramps na hindi maiiwasan kapag sobrang mainit ang panahon at atletang nagkaroon ng allergic reaction matapos masalabay ay agad namang nabigyan ito ng medikal na atensyon kaya lahat ng mga kalahok ay naging maayos ang sitwasyon sa pagtatapos ng palaro.
Tiniyak niya rin na mauulit pa ito sa susunod na taon dahil talagang hihilingin aniya ito sa kanila ng mga partisipante. Sa katunayan, inaayos na nila ni Mayor Lucilo Bayron ang mga kailangang dokumento para rito at may napagkasunduan na silang petsa at ito ay sa November 12, 2023 at isa sa mga aktibidad muli ng Subaraw Biodiversity Festival 2023. (MCE/PIA MIMAROPA)
