Ipapatawag ng Sangguniang Bayan ng Cajidiocan ang kinauukulang contractor at mga awtorisadong kinatawan ng Department of Public Works and Highways (DPWH) upang magpaliwanag tungkol sa mga sheet pile na iniulat na ibinaon sa baybayin ng Barangay Alibagon.
Sa opisyal na pahayag ng konseho, nakatakdang talakayin ang isyu sa susunod na regular session upang malinawan ang mga pangyayari at matukoy ang mga posibleng hakbang na dapat gawin.
Nauna nang tinalakay ang usapin sa regular session noong Oktubre 23, kung saan nagbigay ng privileged speech si Sangguniang Bayan Member Rufino Marc Gotanco upang pormal na ilahad ang mga alalahaning lumitaw matapos kumalat sa social media ang video ng mga nakabaong sheet pile.
Ayon sa konseho, seryoso nitong tinutugunan ang mga tanong at alalahanin ng publiko. Layunin ng pagpatawag na mabigyan ng pagkakataon ang contractor at DPWH na magpaliwanag at maglahad ng mga kaugnay na impormasyon bago magpasya sa mga susunod na hakbang.
Matatandaang kumalat sa social media ang video na nagpapakita ng mga sheet pile na nakabaon sa baybayin ng Barangay Alibagon.
Nauna namang ipinaliwanag ni Cajidiocan Mayor Atty. Marvin Ramos na, batay sa paliwanag ng contractor, pansamantalang inilagay sa lugar ang mga bakal upang maiwasan umano ang pagkawala o pagnanakaw ng mga ito.
Nilinaw din ni Ramos na kuha pa noong 2025 ang video at unti-unti na umanong inililipat ng kompanya ang mga materyales sa kanilang imbakan. Nangako rin umano ang contractor na aalisin ang lahat ng natitirang sheet pile sa baybayin bago matapos ang 2026.
Sa kabila ng paliwanag ng kompanya, nais ng Sangguniang Bayan na direktang marinig ang panig ng contractor at DPWH upang higit na malinawan ang mga detalye ng insidente at matukoy ang nararapat na aksyon.
Hiniling naman ng konseho ang pang-unawa at pasensya ng publiko habang sinusunod ang mga legal at administratibong proseso sa pagtalakay sa isyu.
Tiniyak ng Sangguniang Bayan na pakikinggan nito ang mga alalahanin ng komunidad at sisikaping matugunan ang mga ito sa pamamagitan ng maayos at malinaw na proseso.
