Natagpuang patay ang isang 67-anyos na babaeng magsasaka matapos matagpuang palutang-lutang sa mababaw na tubig sa Sitio Maglihe, Barangay Marigondon, Cajidiocan, Romblon, dakong alas-6:30 ng umaga nitong October 11.
Ayon sa paunang imbestigasyon ng Cajidiocan Municipal Police Station (MPS), residente ng Sitio Catmon, Barangay Cambalo ang biktima.
Dakong alas-1:00 ng madaling araw nang makita umano ng isang residente ang biktima na naglalakad nang mag-isa sa kahabaan ng national road at tila nasa ilalim ng impluwensiya ng alak.
Makalipas ang ilang oras, natagpuan ng isang barangay tanod, kasama ang kanyang mga anak, ang katawan ng biktima habang nangangalap sila ng mga kabibe sa dalampasigan. Agad silang humingi ng tulong sa isang opisyal ng barangay, na siyang nag-ulat sa insidente sa Cajidiocan MPS.
Ayon naman sa anak ng biktima, nakainom umano ang kanyang ina mula pa noong nakaraang gabi at nakagawian nitong maglakad-lakad nang walang tiyak na direksiyon kapag nalalasing, bago umuwi kapag nahimasmasan.
Rumesponde sa lugar ang mga tauhan ng Cajidiocan MPS, Municipal Disaster Risk Reduction and Management Office (MDRRMO), Bureau of Fire Protection (BFP) at Philippine Coast Guard (PCG) upang mai-ahon ang biktima mula sa tubig.
Dinala ang babae sa Sibuyan District Hospital, subalit idineklara siyang dead on arrival. Batay sa pagsusuri ng attending physician, ang sanhi ng kanyang pagkamatay ay asphyxia secondary to drowning o pagkasawi dahil sa kakulangan ng oxygen bunga ng pagkalunod.
Sa paunang imbestigasyon, walang nakitang palatandaan ng foul play.
Muling pinaalalahanan ng Cajidiocan MPS ang publiko na mag-ingat, lalo na sa mga baybayin at iba pang anyong-tubig, at tiyaking ligtas ang mga kapamilyang maaaring malagay sa panganib dahil sa aksidente.
