Inaasahang makatitipid sa oras at pamasahe ang mga micro, small and medium enterprises (MSMEs), job seekers at iba pang residente ng Romblon sa paglulunsad ng electronic notarization o eNotarization ng Korte Suprema nitong October 19.
Sa ilalim ng bagong sistema, maaari nang ipanotaryo online ang mga kwalipikadong electronic document nang hindi kinakailangang bumiyahe nang malayo o personal na magtungo sa tanggapan ng notaryo publiko, alinsunod sa mga itinakdang patakaran.
Inaasahang makatutulong ito sa mga lokal na negosyante sa sektor ng turismo, marmol at agrikultura sa pagproseso ng mga kasunduan sa negosyo, kontrata sa pag-upa at mga dokumento sa pautang.
Maaari rin itong makatulong sa mga job seeker at estudyante na kailangang magpanotaryo ng mga affidavit at iba pang dokumento para sa trabaho o pag-aaral, lalo na sa mga residente ng mga isla na kailangang gumastos sa pamasahe sa bangka at iba pang transportasyon upang makapunta sa notaryo publiko.
Kabilang sa mga unang pasilidad na kinilala ng Korte Suprema para sa eNotarization ang Twala, QLegal at NotarizeIT.
Maaaring magparehistro ang mga interesadong gumagamit sa pamamagitan ng smartphone o computer at pumili mula sa opisyal na listahan ng mga akreditadong electronic notary public upang maproseso ang kanilang mga dokumento online.
Gayunman, nakadepende sa uri ng dokumento at pagsunod sa mga itinakdang rekisito ng Korte Suprema ang paggamit ng serbisyong ito.
