Nagbabala si Dr. Renato R. Menrige Jr., presidente ng Romblon Medical Society, sa panganib ng heat stroke at dehydration sa panahon ng matinding init na inaasahang kaugnay ng Very Strong El Niño.
Ayon kay Menrige, kabilang sa mga posibleng epekto ng matinding init at kakulangan sa suplay ng tubig ang heat stroke, dehydration, at heat stress, lalo na sa mga taong may sakit sa puso.
Maaari umanong makaranas ng pagkahilo, pagsusuka, pamumula ng balat, pagkalito at pagkawala ng malay ang mga taong labis na nalalantad sa init. Kapag hindi agad natugunan, maaari itong magdulot ng malubhang epekto sa utak, puso at iba pang mahahalagang bahagi ng katawan.
Dahil dito, pinayuhan ni Menrige ang publiko na iwasan ang matagal na pagbibilad sa araw, lalo na mula alas-8 ng umaga hanggang alas-4 ng hapon. Sa mga oras na ito, mas mainam umanong manatili sa malamig, malilim at maaliwalas na lugar.
Para naman sa mga manggagawang hindi maiiwasang magtrabaho sa labas, gaya ng mga magsasaka, mangingisda at construction worker, mahalagang uminom ng sapat na tubig at huwag hintaying makaramdam ng uhaw bago uminom. Pinayuhan din silang gumamit ng proteksiyon sa ulo, magsuot ng magaan na damit at magpahinga sa lilim kada dalawang oras.
Binigyang-diin din ng doktor ang kahalagahan ng pag-inom ng tubig at pagpapanatiling malamig ng katawan upang makatulong na maiwasan ang mga karamdamang dulot ng matinding init.
Hinimok ni Menrige ang publiko na maging maingat sa mga palatandaan ng heat stroke at agad humingi ng tulong medikal kapag may nakitang seryosong sintomas.
Sa harap ng inaasahang matinding init, mahalaga rin ang patuloy na edukasyon sa komunidad upang maunawaan ng mga residente ang mga panganib at makapaghanda para mapangalagaan ang kanilang kalusugan.
