Sa oras ng medical emergency, mahalaga ang mabilis na pagkilala sa mga sintomas upang agad na makahingi ng tulong. Isa sa mga gabay na maaaring tandaan ng publiko ang BE-FAST, isang acronym na ginagamit upang makilala ang mga posibleng babalang palatandaan ng stroke.
Sa panayam kay Dr. Renato R. Menrige Jr., presidente ng Romblon Medical Society, ipinaliwanag niya ang kahalagahan ng pagbabantay sa mga pagbabago sa balanse, paningin, mukha, lakas ng mga braso at pagsasalita ng isang tao.
Ano ang ibig sabihin ng BE-FAST?
Ang letrang B ay nangangahulugang Balance. Pansinin kung biglang nahihilo ang isang tao, nawawalan ng balanse o nahihirapang maglakad.
Ang E naman ay Eyes. Bantayan ang biglaang paglabo ng paningin o hirap sa pagtingin.
Ang F ay Face. Hilinging ngumiti ang tao at tingnan kung nakalaylay o hindi pantay ang isang bahagi ng mukha.
Ang A ay Arms. Hilinging itaas ang dalawang braso at tingnan kung may isang brasong nanghihina o kusang bumababa.
Ang S ay Speech. Pakinggan kung bulol, hindi malinaw o nahihirapan siyang magsalita.
Samantala, ang T ay Time. Kapag may alinman sa mga palatandaang ito, agad humingi ng emergency medical assistance at itala kung kailan nagsimula ang mga sintomas.
Ayon sa Centers for Disease Control and Prevention (CDC), mahalagang makilala ang mga sintomas ng stroke at makakuha agad ng medikal na atensiyon dahil maaaring mabawasan ng mabilis na paggamot ang pinsala sa utak.
Huwag maghintay na mawala ang sintomas
Hindi dapat balewalain ang biglaang pagkahilo, pagbabago sa paningin, panghihina ng isang bahagi ng katawan o hirap sa pagsasalita. Kahit mawala ang mga sintomas pagkalipas ng ilang minuto, kailangan pa rin ng agarang pagsusuri ng health professional.
Kung pinaghihinalaang may stroke ang isang tao, tumawag agad sa 911 o sa lokal na emergency service. Huwag hintaying lumala ang kaniyang kalagayan bago humingi ng tulong.
