Pinaiigting ng mga Rural Health Unit (RHU) at Department of Health (DOH) ang pangangalaga sa kalusugan ng mga senior citizen sa lalawigan ng Romblon sa harap ng banta ng matinding init na maaaring idulot ng Super El Niño.
Ayon kay Dr. Renato R. Menrige Jr., pangulo ng Romblon Medical Society, kabilang ang mga senior citizen sa mga bulnerableng sektor na higit na nanganganib sa mga epekto ng matinding init.
Sa panayam sa Kapihan sa PIA, binigyang-diin ni Menrige ang kahalagahan ng edukasyon sa komunidad upang maipaliwanag sa mga matatanda ang mga panganib na dulot ng Super El Niño at ang mga hakbang upang makaiwas sa mga ito.
Patuloy rin ang pakikipag-ugnayan ng mga RHU sa Office of Senior Citizens Affairs (OSCA) upang matugunan ang mga pangangailangan sa kalusugan ng mga nakatatanda, kabilang ang pagbibigay ng mga kinakailangang bitamina.
Nagbabala rin si Menrige na maaaring magdulot ang matinding init ng heat stress at komplikasyon, lalo na sa mga senior citizen na may dati nang karamdaman sa puso at bato. Maaari rin itong makaapekto sa kanilang kalusugang pangkaisipan at magdulot ng pagkabalisa o depresyon.
Upang makaiwas sa panganib, pinapayuhan ang mga senior citizen na manatili sa loob ng bahay o sa malilim at malamig na lugar, lalo na sa oras ng matinding sikat ng araw, ito ay mula alas-8 ng umaga hanggang alas-4 ng hapon. Kung kinakailangang lumabas, ipinapayo ang paggamit ng payong o sombrero bilang proteksiyon laban sa init.
Pinaalalahanan din ang mga pamilya na tiyaking umiinom ng sapat na tubig ang mga nakatatanda, nakakakuha ng sapat na pahinga, at iniiwasan ang pag-inom ng alak.
Sakaling makaranas ng pagkahilo, panghihina o iba pang sintomas ng karamdaman, pinapayuhang agad silang dalhin sa pinakamalapit na health center o RHU para masuri at mabigyan ng angkop na pangangalaga.
