Itatampok ang mga lokal na teknolohiya at research-based solutions mula sa Southern Luzon sa 2026 South Luzon Innovation and Technology Transfer Summit (SLITTS) na gaganapin sa Calapan City Convention Center sa October 8–9, 2026.
Hino-host ng DOST-MIMAROPA, katuwang ang DOST-CALABARZON at DOST-Bicol, ang dalawang araw na summit na magtitipon sa mga researcher, technology generator, industriya, local government units (LGUs), potential technology adopters, akademya at research institutions mula sa CALABARZON, MIMAROPA at Bicol Region.
May temang “Where Problems Meet Solutions: Catalyzing Technology Transfer and Commercialization in South Luzon,” layunin ng SLITTS 2026 na maipakita ang mga teknolohiyang maaaring tumugon sa aktuwal na pangangailangan at hamon ng mga industriya, negosyo, LGU at komunidad.
Tampok sa summit ang Reverse Pitching, kung saan ilalahad ng mga industriya at LGU ang kanilang aktuwal na problema, pangangailangan at priority concerns. Tutugon dito ang mga researcher at technology generator sa pamamagitan ng pagtukoy sa mga umiiral na teknolohiya o pangangailangan para sa karagdagang research and development.
Isasagawa rin ang Technology Pitching para maipakita ng mga researcher ang kanilang mga teknolohiya at research outputs, habang magkakaroon ng Business Matching upang mapag-usapan ng potential adopters at technology generators ang posibleng paggamit, commercialization at partnerships.
Magkakaroon din ng Technology and Innovation Exhibit na magpapakita ng mga teknolohiya, programa, produkto at inisyatiba mula sa research and development institutions, academic institutions, LGUs at DOST-assisted enterprises.
Bahagi rin ng summit ang Asian Productivity Organization-In-Country Development of Demonstration Companies (APO-DMP) Dissemination Conference, na magtatampok sa mga resulta at good practices ng participating State Universities and Colleges sa innovation management, productivity improvement at research commercialization.
Itatampok din ang mga success story ng technology adopters at spin-offs sa Southern Luzon, gayundin ang mga talakayan hinggil sa technology transfer negotiations at agreements.
Kabilang sa mga regional innovation na tampok sa summit ang Project ISIP (Integrated System for Intellectual Property Registration), isang web-based platform na binuo ng DOST-MIMAROPA sa pamamagitan ng DOST Oriental Mindoro upang iugnay ang mga innovator sa intellectual property experts at magbigay ng end-to-end support para sa intellectual property registration.
Patuloy ding pinauunlad ang Project ISIP sa pamamagitan ng artificial intelligence integration at mobile application na nakatakdang magbigay ng guided drafting, intelligent intellectual property recommendations at real-time application tracking, katuwang ang DOST-Technology Application and Promotion Institute (DOST-TAPI).
Bahagi ang SLITTS 2026 ng TECHGROW Project, isang tatlong-taong national initiative na naglalayong palakasin ang innovation capacities ng DOST Regional Offices, State Universities and Colleges at Local Universities and Colleges para sa development, transfer, commercialization at adoption ng market-driven technologies.
Sa pamamagitan ng summit, layunin ng DOST na higit pang palakasin ang ugnayan ng mga researcher, pamahalaan, akademya, industriya at komunidad upang mas maraming research outputs at teknolohiya ang mailipat mula sa laboratories at institutions patungo sa aktuwal na paggamit, commercialization at praktikal na aplikasyon sa Southern Luzon. (PR)
