Nilagdaan ni Pangulong Ferdinand R. Marcos Jr. ang mga susog sa Universal Access to Quality Tertiary Education Act (UAQTEA) upang palawakin ang tulong-pinansyal ng pamahalaan para sa mga estudyante sa kolehiyo at mga kumukuha ng technical-vocational education and training (TVET).
Pinangunahan ni Marcos ang ceremonial signing ng amendments sa Malacañang Palace noong September 4, 2026, kung saan binigyang-diin niya na dapat magkaroon ng pantay na pagkakataon ang bawat kabataang Pilipino na makakuha at makatapos ng de-kalidad na tertiary education.
“It is a great honor for me to finally sign the Act Enhancing the Universal Access to Quality Tertiary Education Act,” pahayag ng Pangulo.
Ayon kay Marcos, mahalaga ang bagong batas sa layunin ng administrasyon na matiyak na ang bawat kabataan, lalo na ang mga mula sa pinakamahihirap at disadvantaged na pamilya, ay mabigyan ng pagkakataong makapag-aral sa kolehiyo o makakuha ng technical-vocational skills.
Bagama’t malaking hadlang na ang natanggal sa pamamagitan ng libreng tuition at iba pang school fees sa mga pampublikong higher education institutions at state-run technical-vocational institutions, sinabi ng Pangulo na marami pa ring gastusin ang mga pamilya tulad ng libro, pamasahe, pang-araw-araw na pangangailangan at iba pang school requirements.
Dahil dito, sinabi niyang hindi nagtatapos sa pagbubukas ng pinto ng mga pampublikong kolehiyo, unibersidad at technical-vocational institutions ang responsibilidad ng pamahalaan.
“We must help all our learners remain in school or training until they complete their studies and acquire the skills that they need to succeed,” ani Marcos.
Sa ilalim ng amendments, higit na pagtutuunan ng government assistance ang mga estudyanteng higit na nangangailangan, partikular ang mga mula sa mahihirap at disadvantaged na pamilya, kabilang ang mga kwalipikadong benepisyaryo ng Pantawid Pamilyang Pilipino Program (4Ps).
Maaari ring makatanggap ng suporta ang mga mahihirap at kwalipikadong estudyante na kumukuha ng mga priority programs ngunit hindi saklaw ng kasalukuyang mga grant, kabilang ang pagkakataong makapag-aral sa mga kwalipikadong pribadong higher education at technical-vocational institutions.
Ayon sa Pangulo, magpapalawak ito sa oportunidad para sa mas maraming Pilipino na makakuha ng degree, diploma o skills qualification.
Layunin din ng bagong batas na palakasin ang implementasyon ng UAQTEA sa pamamagitan ng pagpapalawak ng financial assistance para sa disadvantaged learners at pagpapahusay sa monitoring at accountability mechanisms ng Unified Student Financial Assistance System for Tertiary Education (UniFAST).
Ang UniFAST ay nagsisilbing mekanismo sa paglalaan, paggamit at pagtukoy sa mga benepisyaryo ng government resources para sa higher at technical education, kabilang ang pagtutok sa mga kursong itinuturing na prayoridad para sa economic growth and development.
Dumalo sa ceremonial signing sina Commission on Higher Education (CHED) Chairperson Shirley Agrupis, Senate President Sherwin Gatchalian at mga senador, House Speaker Bojie Dy at mga miyembro ng House of Representatives, mga miyembro ng Gabinete, student beneficiaries at iba pang stakeholders.
