Mga Romblomanon suportado ang panawagan ni PBBM na alisin ang system loss sa singil sa kuryente

Nagpahayag ng suporta ang ilang Romblomanon sa panawagan ni Pangulong Ferdinand R. Marcos Jr. na amyendahan ang Electric Power Industry Reform Act (EPIRA) of 2001 upang ipagbawal ang pagpapasa ng system loss charges at kaugnay nitong value-added tax (VAT) sa mga konsyumer ng kuryente.

Sa kanyang ikalimang State of the Nation Address (SONA), hinimok ng Pangulo ang Kongreso na agarang amyendahan ang EPIRA upang hindi na maipasa sa mga mamimili ang system loss.

“At kung pagbawas ng presyo ang usapan, sa aking palagay panahon na para tanggalin na natin ang system loss na pinapasa sa consumer,” ani Pangulong Marcos.
Binigyang-diin din niya na hindi dapat akuin ng mga konsyumer ang pagkalugi sa transmission at distribution ng kuryente.

“Hindi naman kasalanan ng consumer kung bakit nagkaroon ng system loss. Kaya hindi naman tama na kailangan sila pa ang pagbabayarin dito,” dagdag ng Pangulo.

Suportado ni Odiongan Sangguniang Bayan Member at Committee Chair on Energy Manuel Fernandez ang panukala ng Pangulo.

“Sang-ayon po ako sa panawagan ng ating mahal na Pangulo sa kaniyang SONA na tanggalin na ang system loss sa bill ng kuryente. Hindi tama na consumers ang sumalo sa kapabayaan ng power company sa pamamahagi ng kuryente. Salamat po,” ani Fernandez.

Ayon naman kay Elma Garcia Alubog, matagal nang pasan ng mahihirap na konsyumer ang naturang singilin.

“Panahon na talaga. Matagal nang mga mahihirap na konsyumer ang nagpapasan sa bayad sa system loss,” saad niya.

Samantala, sinabi ni DVine Gabay na malaking ginhawa sa mga mamimili kung tuluyang maaalis ang system loss sa kanilang buwanang bayarin sa kuryente.

“Sana ay maipatupad ito dahil malaking dagdag lang sa aming buwanang bayarin sa kuryente ang system loss,” aniya.

Bukod sa pag-alis ng system loss charges, hiniling din ni Pangulong Marcos sa Kongreso ang agarang pagpasa ng Sariling Kuryente Act, na layong gawing mas madali at mas mura ang paglalagay ng solar panels at battery energy storage systems sa mga tahanan upang mabawasan ang gastusin sa kuryente.

Kapag naaprubahan ng Kongreso, inaasahang magiging bahagi ang mga panukalang ito ng mas malawak na programa ng administrasyon upang mapababa ang halaga ng kuryente at mapagaan ang gastusin ng mga pamilyang Pilipino.