Sa unang pagkakataon ay ipinagdiwang ng bayan ng Odiongan ang Social Enterprise Week kasunod ng pagkakatatag ng Tatak SE: Ato Kali Industries ordinance noong nakaraang taon.
Sa ginanap na opening program ng pagdiriwang nitong November 4, binigyang diin ni Odiongan Mayor Roger Fodra Jr. ang kahalagahan ng pagsusulong ng mga lokal na negosyo at pagsuporta sa mga producer upang makalikha ng mas maraming oportunidad pangkabuhayan para sa mga mamamayan.
hinikayat ni Fodra ang mga aspiring entrepreneur na patuloy na matuto, umangkop sa mga pagbabago, at bumuo ng mga negosyong may kakayahang magtagal at umunlad.
Binigyang-diin din ng alkalde ang kahalagahan ng pagsuporta sa mga lokal na producer at paggamit nang husto sa mga likas na yaman at talento ng komunidad upang higit na mapalakas ang lokal na ekonomiya.
Ayon kay Fodra, layunin ng kanilang administrasyon na makalikha ng konkretong oportunidad para sa mga ordinaryong pamilya, mapalakas ang mga komunidad, at mabigyan ng makabuluhang papel ang mga mamamayan sa pag-unlad ng Odiongan.
Inaasahan ding magsisilbing panimulang hakbang ang Social Enterprise Week para sa mas matibay na ugnayan at tuloy-tuloy na pagtutulungan ng iba't ibang sektor sa pagsusulong ng mga social enterprise sa lalawigan ng Romblon
Tampok sa social enterprise week ang iba't ibang programa na inihanda ng lokal na pamahalaan kabilang na ang pagkakaroon ng mini-expo at night market kung saan tampo ang mga MSMEs.
Dumalo rin sa programa ang mga kinatawan mula sa iba't ibang ahensya ng pamahalaan, kabilang ang Department of Trade and Industry (DTI), gayundin ang Department of Science and Technology (DOST), Department of Education, TESDA at Romblon State University.
Ang Social Enterprise Week ay magtatagal hanggang November 13.
