Binigyang-diin ni Congressman Eleandro Jesus “Budoy” Madrona ang tatlong pangunahing prayoridad sa kanyang paglilingkod sa Romblon: kaunlaran ng mga barangay, kapakanan ng kabataan, at pagtulong sa mga mahihirap at kapos-palad.
“Tatlo lang talaga ang pinupursigi na maibigay sa inyo. Una, kaunlaran ng mga barangay; ikalawa, kapakanan ng mga kabataan; at ikatlo, pagtulong sa mga mahihirap at kapos-palad,” ani Madrona.
Kabilang sa mga proyektong iniuugnay niya sa kaunlaran ng mga barangay ang pagpapailaw sa mga komunidad at pagpapaayos ng mga kalsada.
Para naman sa kabataan, binanggit niya ang pagkakamit ng Romblon State College ng katayuang unibersidad bilang Romblon State University. Isinusulong din ang conversion ng Romblon National Institute of Technology (RNIT) bilang Romblon State Polytechnic Institute, na inaasahang magbibigay ng mas maraming oportunidad sa edukasyon.
“Ang gusto ko ho talaga, matulungan ang ating mga kabataan,” dagdag niya.
Binigyang-diin din ni Madrona ang pagtulong sa mga pamilyang nangangailangan at tiniyak na magpapatuloy ang kanyang pagsisikap habang siya ang kinatawan ng lalawigan sa Kongreso.
“Habang ako pa ang inyong Congressman, hindi po ako papara ng kakayulong sa inyo,” pahayag niya.
Tinutukoy rin ni Madrona ang mga batikos na natatanggap niya simula pa noong unang bahagi ng taon. Gayunman, sinabi niyang mas pinipili niyang ituon ang kanyang oras at lakas sa serbisyo sa halip na magpokus sa mga negatibong komento.
Hinimok din niya ang kanyang mga kasamahan at tagasuporta na manatiling nagkakaisa sa paglilingkod sa mga Romblomanon.
