Itinalaga ni Pangulong Ferdinand R. Marcos Jr. si Associate Justice Rodil V. Zalameda bilang bagong punong mahistrado ng Korte Suprema, ayon sa anunsiyo ng Palasyo nitong Huwebes.
Papalitan ni Zalameda si Chief Justice Alexander G. Gesmundo, na magreretiro sa Nobyembre 6, 2026.
Inanunsiyo ni Presidential Communications Office Acting Secretary Lino Edgardo Cayetano ang appointment sa isang press briefing sa Palasyo. Ayon kay Cayetano, isinaalang-alang sa pagpili kay Zalameda ang mahigit tatlong dekada nitong serbisyo sa hudikatura bilang court official, piskal at mahistrado ng Court of Appeals at Korte Suprema.
Sinabi ni Cayetano na inaasahan ng administrasyon na pamumunuan ni Zalameda ang hudikatura nang may integridad, pagiging patas at pagsunod sa batas.
Naging Associate Justice ng Korte Suprema si Zalameda noong Agosto 2019, matapos ang 11 taon sa Court of Appeals, kung saan pinamunuan niya ang 17th Division.
Nagsimula siya sa serbisyo ng pamahalaan bilang branch clerk ng Regional Trial Court sa Makati City matapos pumasa sa 1988 Bar examinations. Naging abogado rin siya sa pribadong praktis bago bumalik sa serbisyo publiko bilang piskal. Noong 2002, naging city prosecutor siya ng Mandaluyong.
Nagtapos si Zalameda ng Bachelor of Laws sa Ateneo de Manila University noong 1987 sa ilalim ng academic scholarship. Naging associate editor din siya ng Ateneo Law Journal at senior staff member ng Ateneo Law Bulletin.
Nang tanungin tungkol sa mga pangamba sa pagiging independent ni Zalameda, sinabi ni Cayetano na naniniwala ang administrasyon sa pagiging walang kinikilingan ng hudikatura.
Si Zalameda ay kabilang sa limang nominado ng Judicial and Bar Council para sa pinakamataas na posisyon sa hudikatura. Kabilang sa iba pang nominado sina Associate Justices Marvic Leonen, Alfredo Benjamin Caguioa, Japar B. Dimaampao at Jose Midas P. Marquez.
