Pormal nang inilunsad ng Department of Education (DepEd) MIMAROPA ang School-Based Feeding Program (SBFP) para sa School Year 2026–2027 sa rehiyon sa isinagawang regional kickoff sa Looc Central Elementary School sa bayan ng Looc, Romblon nitong July 8.
Kasabay ito ng nationwide launch na pinangunahan ni Pangulong Ferdinand R. Marcos Jr. sa Pulilan Central School sa Bulacan, kung saan inihayag ng Pangulo ang pagpapalawak ng feeding program upang saklawin na ang lahat ng mag-aaral at hindi na lamang ang piling benepisyaryo.
Ayon kay Marcos, layunin ng pinalawak na programa na matiyak na ang bawat mag-aaral ay magkakaroon ng masustansyang pagkain sa paaralan upang makatulong sa paglaban sa gutom, malnutrisyon, at stunting, gayundin sa pagpapabuti ng kanilang pagkatuto.
Binigyang-diin din ng Pangulo na makikinabang ang mga lokal na magsasaka at supplier dahil prayoridad ng pamahalaan ang pagbili ng mga lokal na produktong pagkain para sa feeding program at iba pang programa ng gobyerno.
Sa Romblon, dinaluhan ang regional launching nina Schools Division Superintendent Roger Capa, Governor Trina Fabic, Looc Mayor Lisette Arboleda, mga opisyal ng DepEd, kinatawan ng mga lokal na pamahalaan, at iba pang stakeholders.
Malugod namang tinanggap ni Arboleda ang pagpapalawak ng programa, at sinabing matagal nang ipinatutupad ang school feeding initiatives sa mga paaralan sa pamamagitan ng mga programang tulad ng pamamahagi ng NutriBun. Aniya, malaking hakbang ang pagdaragdag ng hot meals para sa mga mag-aaral.
Gayunman, iginiit ng alkalde na katuwang lamang ng mga magulang ang mga paaralan sa pagtataguyod ng wastong nutrisyon ng mga bata.
“Dapat tandaan natin na ang paaralan ay katuwang lamang. Nananatiling responsibilidad ng mga magulang ang pagbibigay ng masustansyang pagkain sa kanilang mga anak,” ani Arboleda.
Hinimok din niya ang mga guro at opisyal ng paaralan na patuloy na gabayan ang mga magulang sa kahalagahan ng wastong nutrisyon at sa mga praktikal na paraan ng paghahanda ng masustansyang pagkain sa tahanan upang maging katuwang ang feeding program sa pagpapabuti ng kalusugan ng mga bata.
Ayon sa DepEd, bahagi ang pinalawak na School-Based Feeding Program ng mas malawak na hakbang ng administrasyong Marcos upang mapabuti ang kalusugan ng mga mag-aaral, mapataas ang attendance at academic performance, at masuportahan ang mga lokal na magsasaka sa pamamagitan ng pagbili ng mga lokal na produktong pagkain para sa programa.
Discussion about this post