Isasama sa eGovPH superapp ang digital ID feature ng MySSS Card at ilang serbisyo ng Social Security System (SSS) upang mas mapadali ang pag-access ng mga miyembro sa kanilang impormasyon at serbisyo.
Nilagdaan ng SSS at Department of Information and Communications Technology (DICT) ang data-sharing agreement noong Oktubre 21, 2026, sa Quezon City. Lumagda sa kasunduan sina DICT Secretary Robert Joseph M. de Claro at SSS President and Chief Executive Officer Victor Alfonso A. Limlingan.
Sa sandaling maisama na sa app, makikita ng mga miyembro ang front-facing digital representation ng MySSS Card bilang isa sa mga ID na maaaring ma-access sa eGovPH. Maaari rin nilang tingnan ang kanilang contribution history, kabuuang bilang ng kontribusyon, pinakahuling uri ng membership at pinakahuling impormasyon tungkol sa employer.
Ayon sa SSS, makatutulong ang mga serbisyong ito upang masuri ng mga miyembro kung naipost na ang kanilang mga kontribusyon at mapatunayan ang kanilang membership at employer information.
Sinabi ni Limlingan na bahagi ang integrasyon ng digital transformation ng SSS at layuning gawing mas maginhawa ang pag-access sa mga serbisyo nito. Sa pamamagitan ng eGovPH, magkakaroon ang mga miyembro ng isa pang paraan upang makita ang kanilang mga rekord, bukod sa MySSS mobile app.
Layunin din ng partnership na mapalawak ang access sa social protection ng mga digital worker, kabilang ang mga freelancer at online professional, sa pamamagitan ng mas madaling paghanap at paggamit ng mga serbisyo ng SSS online.
Bahagi ang kasunduan ng mas malawak na hakbang ng pamahalaan na pag-isahin sa isang digital platform ang mga serbisyo ng iba’t ibang ahensya. Ayon sa SSS, kabilang ito sa mga ahensyang maglalaan ng serbisyo sa eGovPH superapp.
