Pinangalanan na ng Samahang Basketbol ng Pilipinas (SBP) ang 12-man lineup ng Gilas Pilipinas para sa ikatlong window ng 2027 FIBA World Cup Asian Qualifiers.
Kabilang sa mga napili ni Gilas head coach Tim Cone sina Justin Brownlee, RJ Abarrientos, Justine Baltazar, AJ Edu, June Mar Fajardo, Chris Newsome, Mike Phillips, Kevin Quiambao, Dwight Ramos, Troy Rosario, Carl Tamayo, at Scottie Thompson.
Nakatakdang sumabak ang Gilas sa dalawang mahahalagang away games sa Group A. Una nilang haharapin ang New Zealand sa Hulyo 3, 2026 bago makasagupa ang Australia sa Hulyo 6, 2026.
Sa kasalukuyan, hawak ng Gilas Pilipinas ang 2-2 kartada sa Group A. Naitala ng pambansang koponan ang dalawang panalo laban sa Guam sa kanilang home-and-away series ngunit nakaranas ng magkasunod na pagkatalo kontra New Zealand at Australia sa mga laro na ginanap sa Pilipinas noong nakaraang window.
Sa kabila ng mabibigat na hamon laban sa dalawang powerhouse ng Oceania, nananatiling positibo si Cone at ang buong koponan na makakakuha sila ng panalo sa kanilang nalalabing mga laro sa qualifying window.
Mahalaga ang mga laban na ito sa kampanya ng Gilas para makausad sa susunod na yugto ng qualifiers at mapanatiling buhay ang kanilang hangaring makabalik sa FIBA Basketball World Cup 2027.
Discussion about this post