Ramdam umano ng maraming residente sa Romblon ang epekto ng inflation noong Abril kasabay ng pagtaas ng presyo ng produktong petrolyo, pamasahe, at ilang pangunahing bilihin sa lalawigan.
Ayon kay Luzvizminda Merano, isang magsasaka sa Odiongan, malaking epekto sa kanilang pang-araw-araw na gastusin ang sunod-sunod na pagtaas ng presyo ng mga bilihin at transportasyon.
“Halos lahat po kasi tumaas na. Yung gastos sa pamasahe, pati presyo ng pagkain ramdam na ramdam po namin,” ayon kay Merano.
Batay sa datos ng Philippine Statistics Authority (PSA) Romblon, umabot sa 3.5 percent ang inflation rate ng lalawigan noong Abril.
Bagama’t ito ang pinakamababang inflation rate sa buong rehiyon ng MIMAROPA, sinabi ng PSA na nananatili pa ring ramdam ng mga mamimili ang epekto nito lalo na sa presyo ng pagkain at transportasyon.
Ayon kay Engr. Johnny Solis, Chief Statistical Specialist ng PSA Romblon, kabilang sa pangunahing dahilan ng pagtaas ng inflation sa lalawigan ang pagmahal ng presyo ng gasolina at diesel, pati na rin ang pagtaas ng pamasahe sa mga tricycle, van, at public utility jeepneys.
Ipinaliwanag ni Solis na kapag tumataas ang halaga ng produktong petrolyo ay naaapektuhan din ang transport cost ng mga produkto kaya tumataas ang presyo ng ibang commodities tulad ng bigas, isda, gulay, at mga prutas.
“Kapag mataas ang presyo ng fuel, tumataas din ang gastos sa transportasyon at paghahatid ng mga produkto kaya naaapektuhan din ang presyo ng mga pangunahing bilihin,” paliwanag ni Solis.
Dagdag pa niya, malaking bahagi ng mga produktong kinokonsumo sa Romblon ay inaangkat pa mula sa ibang lalawigan kaya sensitibo ang presyo nito sa pagtaas ng freight at transportation costs.
Ayon din sa PSA, kabilang sa mga sektor na higit na naaapektuhan ng inflation ang mga magsasaka, mangingisda, at mga low-income households dahil mas malaking bahagi ng kanilang kita ang napupunta sa pagkain at pamasahe.
Sa kabila nito, nananatili pa ring pinakamababa ang inflation rate ng Romblon sa buong MIMAROPA region.
Batay sa regional data ng PSA, umabot sa 5.9 percent ang inflation rate ng MIMAROPA noong Abril. Pinakamataas ang naitalang inflation sa Occidental Mindoro na may 9.0 percent habang pinakamababa naman ang Romblon na may 3.5 percent.
Discussion about this post