Hinikayat ni Helen S. Servañez, Senior Cooperative Development Specialist ng Cooperative Development Authority (CDA) MIMAROPA, ang mga kooperatiba sa Romblon na palakasin ang tiwala sa pagitan ng mga lider at miyembro upang maging mas matatag at kapaki-pakinabang ang kanilang mga organisasyon.
Sa kanyang mensahe sa ginanap na ika-20 Ragipunan o Romblon Provincial Cooperative Congress, sinabi ni Servañez na mahalaga ang tiwala ng mga miyembro sa kanilang mga lider at sa mismong kooperatiba upang matiyak na mapoprotektahan ang kanilang interes, lalo na sa panahon ng mga hamon.
“A cooperative will not remain strong if there is no trust. On the other hand, a cooperative with humble beginnings can become very powerful when members have unity, integrity and a genuine concern for one community,” pahayag ni Servañez.
Binigyang-diin din niya na ang pamumuno sa kooperatiba ay hindi dapat nakabatay sa kapangyarihan o pera kundi sa paglilingkod sa mga miyembro.
“Leadership in cooperative is not about power, it's not about money, it is about service.”
Sinabi ni Servañez na bawat perang ipinagkakatiwala ng mga miyembro ay bunga ng kanilang pagsisikap, habang ang bawat miyembro ay kumakatawan sa isang pamilya na umaasa sa kooperatiba.
Dahil dito, hinikayat niya ang mga opisyal ng kooperatiba na maging transparent, accountable at innovative sa kanilang pamamalakad.
Hinimok naman niya ang mga miyembro na huwag manatiling miyembro lamang sa papel kundi aktibong makilahok sa mga gawain ng kanilang kooperatiba.
Ayon kay Servañez, mahalaga ang aktibong partisipasyon ng mga miyembro lalo na sa general assembly, kung saan maaari silang magbigay ng suhestiyon at makilahok sa mga usaping may kinalaman sa direksyon at pag-unlad ng kanilang organisasyon.
“If the members are united, the cooperative becomes strong. If the members participate, the cooperative becomes relevant. And if the members care for one another, the cooperative becomes more than an organization. It becomes a family,” pahayag pa ni Servañez.
Kabataan, hinikayat na makilahok
Hinimok din ni Servañez ang mga kabataan na makilahok sa cooperative movement at ihanda ang kanilang sarili bilang susunod na henerasyon ng mga lider ng kooperatiba.
“We need young people who will still believe in the value of community, solidarity, service, and… do not think that cooperatives belong only to the older generation. You are the next generation of cooperative leaders,” pahayag ni Servañez.
Sinabi rin niya na mahalagang maagang maituro sa mga kabataan ang konsepto ng pag-iimpok at financial responsibility sa pamamagitan ng mga youth o laboratory cooperatives.
Sa pagtatapos ng kanyang mensahe, sinabi ni Servañez na hindi nasusukat sa laki ang lakas ng isang kooperatiba kundi sa antas ng tiwala, paglilingkod at pakikilahok ng mga miyembro nito.
Hinikayat niya ang mga kooperatiba na patuloy na palakasin hindi lamang ang kanilang mga organisasyon kundi pati ang mga komunidad na kanilang pinaglilingkuran.
