Sugatan ang walong indibidwal kabilang ang anim na estudyante matapos magbanggaan ang isang tricycle at motorsiklo sa Provincial Road, Barangay Ginablan, Romblon, Romblon bandang alas-4:15 ng hapon noong October 1.
Ayon sa inisyal na imbestigasyon ng Romblon Municipal Police Station (MPS), sangkot sa insidente ang isang pulang Yamaha STX 155 tricycle na minamaneho ng isang 61-anyos na lalaki.
Sakay ng tricycle ang anim na pasahero na pawang mga estudyante, limang menor de edad na babae na may edad 12 hanggang 17 at isang 13-anyos na lalaki, na mga residente ng iba’t ibang barangay sa bayan ng Romblon.
Kasangkot din sa aksidente ang isang kulay gray-black na Honda TMX 155 motorcycle, na minamaneho ng isang 36-anyos na lalaki na empleyado ng Provincial Government Office. Ayon sa pulisya, hindi umano ito nakapagpakita ng driver’s license sa oras ng insidente.
Batay sa imbestigasyon, bumibiyahe ang tricycle mula sa sentro ng bayan ng Romblon patungong Barangay Agpanabat habang ang motorsiklo naman ay nagmumula sa kabilang direksyon.
Pagdating sa isang kurbadang bahagi ng kalsada, iniulat na umano’y mabilis ang takbo ng motorsiklo at lumipat ito sa linya ng tricycle, na nagresulta sa head-on collision.
Parehong nagtamo ng pinsala ang dalawang sasakyan, habang ang dalawang driver at anim na pasahero ng tricycle ay nagtamo ng iba’t ibang sugat at pinsala sa katawan.
Agad na isinugod ang mga nasugatan sa Romblon District Hospital para sa kaukulang pagpapagamot.
Dinala naman ang dalawang sangkot na sasakyan sa himpilan ng Romblon MPS para sa dokumentasyon at kaukulang disposisyon. Patuloy ang isinasagawang imbestigasyon ng mga awtoridad kaugnay ng insidente.
