Nanawagan si Sangguniang Panlalawigan Committee on Cooperatives Chairperson SP Irene Morgado sa mga kooperatiba sa Romblon na palakasin ang pagkakaisa, magbahagi ng mga solusyon at magtulungan upang mapabuti ang buhay ng kanilang mga miyembro.
Sa kanyang mensahe sa 20th Provincial Cooperative Congress, binigyang-diin ni Morgado ang kahalagahan ng aktibong pakikilahok ng mga kooperatiba sa pagtukoy ng kanilang mga problema at pangangailangan dahil sila mismo ang nasa komunidad at direktang nakakasalamuha ng kanilang mga miyembro.
Ayon sa opisyal, tungkulin ng provincial government at iba pang katuwang na ahensya na paglapitin ang mga kinakailangang resources at katuwang upang maisakatuparan ang mga mungkahing nagmumula sa mga kooperatiba.
Binigyang-diin din niya na ang cooperative congress ay hindi lamang pagkakataon para sa reunion o seminar, kundi isang pagkakataon upang makabuo ng mga bagong partnership at matuto mula sa mga kooperatibang may mga naipatupad nang proyekto at programa.
Sinabi rin niya na hindi lamang dapat masukat ang kalagayan ng isang kooperatiba batay sa laki ng kapital, assets o bilang ng miyembro, kundi pati sa epekto nito sa buhay ng mga taong kabilang dito.
Hinikayat ni Morgado ang mga kooperatiba na gamitin ang dalawang araw na congress upang magpalitan ng kaalaman, makahanap ng mga posibleng partnership at tuklasin ang mga oportunidad na maaaring makatulong sa kanilang mga miyembro.
Nanawagan din siya na ipagpatuloy ang pagtutulungan ng mga kooperatiba at ng Provincial Cooperative Development Council sa mga susunod na taon.
