Naputulan ng paa ang isang 66-anyos na Lolo matapos itong mabiktima ng hit-and-run accident ng isang SUV noong gabi ng March 14 sa Barangay Limon Norte, Looc, Romblon.
Batay sa ulat ng pulisya, pauwi na umano ang matanda mula sa isang inuman nang maisipan nitong magpahinga at humiga sa gilid ng national road.
Habang nagpapahinga, naramdaman na lamang ng biktima na may gulong ng isang SUV na dumaan sa kanyang paa, dahilan upang magtamo siya ng matinding pinsala. Hindi umano tumigil ang sasakyan at agad na tumakas matapos ang insidente.
Agad namang isinugod sa ospital ang biktima kung saan sumailalim siya sa operasyon. Dahil sa tindi ng pinsala, kinailangan nang putulin ang kanyang paa.
Patuloy naman ang imbestigasyon ng Looc Municipal Police Station upang matukoy ang sasakyan at ang driver na sangkot sa insidente.
Nanawagan din ang pamilya ng biktima sa publiko na kung may mga CCTV camera sa rutang dinaanan mula Looc patungong Odiongan, partikular sa pagitan ng alas-9 hanggang alas-10 ng gabi, ay maaaring makatulong ang mga ito sa pagkilala sa sasakyang sangkot sa aksidente.
