Nagpahayag ng pasasalamat ang mga lokal na opisyal sa lalawigan ng Romblon sa Maritime Industry Authority (MARINA) at Department of Transportation (DOTr) matapos payagan ang isang shipping company na pansamantalang gumamit ng Cajidiocan Port sa Sibuyan Island sa gitna ng patuloy na masamang panahon sa karagatan.
Inanunsyo ng Starlite Ferries na pansamantala munang dadaong ang kanilang mga barko sa Cajidiocan Port sa halip na sa Ambulong Port dahil sa malalakas na alon sa karaniwang pantalan na nagdudulot ng panganib sa pagdaong ng mga sasakyang pandagat. Dahil dito, kinailangan ding magpatupad ng adjustments sa iskedyul at operasyon ng mga biyahe.
Simula pa noong unang araw ng 2026, maraming pasahero ang na-stranded sa Ambulong Port matapos kanselahin ang ilang biyahe bunsod ng maalon na karagatan. Hindi umano makadaong ang mga barko ng iba’t ibang shipping lines dahil sa delikadong kondisyon ng dagat.
Ayon kay Cajidiocan Mayor Marvin Ramos, ang pansamantalang paggamit ng Cajidiocan Port ay isang praktikal at mas ligtas na solusyon lalo na ngayong panahon ng Amihan. Aniya, mas hindi gaanong naaapektuhan ng malalakas na alon ang Cajidiocan Port kumpara sa Ambulong Port.
Dagdag pa ng alkalde, magpapatuloy ang araw-araw na biyahe ng barko ng Starlite Ferries patungong Sibuyan Island na dadaong sa Cajidiocan Port hanggang sa katapusan ng buwan upang maibsan ang backlog ng mga pasahero at matiyak ang tuloy-tuloy na transportasyon habang hindi pa bumubuti ang lagay ng panahon.
Ang pansamantalang kaayusang ito ay resulta ng koordinasyon ng mga lokal na pamahalaan sa Sibuyan Island, mga kinauukulang ahensya ng pambansang pamahalaan, at mga shipping operators upang tugunan ang paulit-ulit na aberya sa biyahe dulot ng masamang kondisyon ng karagatan.
