Nagsimula na ang Northeast Monsoon o Amihan season matapos mapansin ng Philippine Atmospheric, Geophysical and Astronomical Services Administration (PAGASA) ang paglakas ng High Pressure Area sa East Asia, na nagdudulot ng pag-ihip ng hanging amihan at pagbaba ng temperatura sa Extreme Northern Luzon.
Ayon sa PAGASA, inaasahang magiging dominante ang Amihan sa malaking bahagi ng bansa sa mga susunod na buwan, na magdadala ng mas malamig na panahon, mga yugto ng cold surge o biglaang paglamig, at maalon na karagatan.
Maaari ring makaapekto sa lagay ng panahon ang shear line, mga tropical cyclone, at Intertropical Convergence Zone (ITCZ) sa panahon ng Amihan.
Patuloy namang imo-monitor ng PAGASA ang lagay ng panahon at klima sa bansa, lalo na sa gitna ng umiiral na El Niño na inaasahang lalakas at magiging very strong bago matapos ang taon.
Pinayuhan ng ahensiya ang publiko at mga kinauukulang tanggapan na regular na subaybayan ang mga opisyal na ulat at abiso nito, partikular ang mga babala hinggil sa lagay ng panahon at kondisyon ng karagatan.
