Nasaksak ang isang 26-anyos na lalaki na umawat lamang sa suntukan sa gitna ng isang sayawan sa Barangay Agnipa, Sabado ng gabi, Hunyo 14.
Sa ulat ng Romblon Municipal Police Station, habang abala ang mga tao sa pagsasayawan sa gitna ng barangay plaza ay bigla umanong nagkaroon ng mainitang suntukan sa pagitan ng 27-anyos na suspek at isa pang lalaki.
Sinubukan umanong awatin ng biktima, na kinilala sa alyas na Bimby, ang gulo ngunit sa halip na tumigil, ay bigla umano siyang sinaksak ng suspek sa tiyan.
Agad na isinugod ang biktima sa Romblon District Hospital para sa agarang medikal na atensyon, habang inaresto naman ng mga miyembro ng Agnipa Civil Forces ang suspek at agad itong isinuko sa mga rumespondeng pulisya.
Kasalukuyang nakakulong ang suspek at mahaharap sa kasong frustrated homicide. Patuloy pa ang imbestigasyon ng mga awtoridad upang matukoy ang puno’t dulo ng insidente.
