Ipinahayag ni Governor Jose “Otik” Riano ang kanyang pasasalamat at pagmamalaki matapos muling makapasok ang Bon Bon Beach sa prestihiyosong listahan ng World’s 50 Best Beaches ngayong 2025.
Mula sa ika-45 pwesto noong nakaraang taon, umakyat sa ika-38 ang Bon Bon Beach — isang patunay umano ng sipag at dedikasyon ng mga mamamayan, lokal na pamahalaan ng Romblon, at ng Provincial Tourism Office sa pagpapaganda ng turismo sa lalawigan.
“Mula sa sipag ng ating mga kasimanwa, munisipyo, at Romblon Provincial Tourism Office, tunay po ang kasabihang ‘malayo pa, pero malayo na,’” ayon kay Gov. Riano sa kanyang pahayag.
Binati rin ni Riano ang pamunuan ng bayan ng Romblon, sa pangunguna nina Mayor Gard Montojo at Vice Mayor Anoy Mateo, pati na ang Sangguniang Bayan, sa kanilang aktibong suporta sa mga inisyatibang panturismo.
Bagaman aminado ang gobernador na mas mataas pa rin ang tourist arrivals sa ibang bahagi ng MIMAROPA — gaya ng mga syudad na mas malapit sa Batangas o mga destinasyong nasa iisang isla — itinuturing niyang tagumpay na maituturing ang unti-unting pag-angat ng lalawigan sa pandaigdigang turismo.
“Naging mahirap ang proseso, pero patuloy tayong umaangat. Ibinibigay natin ang pagkilalang ito para sa buong Romblon,” dagdag ni Riano.
Ang Bon Bon Beach ay kilala sa mala-postcard nitong sandbar na lumilitaw tuwing low tide, na tumatawid patungong Bangug Island. Sa kabila ng pagiging tahimik at hindi gaanong matao, inirerekomenda ito ng mga eksperto sa turismo dahil sa taglay nitong natural na ganda, malinaw na tubig, at maputing buhangin.
