Tatlong taon na ang lumipas mula noong huling halalan—tatlong taong puno ng pangako, ngunit mas marami ang pang-aabuso sa kapangyarihan at katiwalian (hindi naman lahat); tatlong taong sinayang ang tiwala ng sambayanan. Maraming Pilipino ang nadismaya, nawalan ng gana, at nawalan ng pag-asa dahil sa mga lider na ibinoto nilang may pag-asang magdadala ng pagbabago, pero sa huli, nagdala lang ng sariling interes at katiwalian. Eh, biruin mo nga naman na sila-sila sa partido, kanya-kanya ring baklasan at hiwalayan. Yung dating ‘isang team' kuno, ngayon ay magkaaway na.
Hindi na bago ang istorya ng mga politikong sinungaling. Panahon pa lang ng kampanya, batid na ng ilan kung sino ang may kakayahan at sino ang may maitim na hangarin. Ngunit sa dami ng pondo, propaganda, at pangakong walang laman, madalas nananaig ang kasinungalingan sa halip na katotohanan. At ngayon, ang bansa ang naghihirap.
Sa loob ng tatlong taon, marami sa kanila ang nabaon sa isyu ng korapsyon: overpriced na proyekto, ghost employees, biglaang pagyaman ng mga opisyal, at kabiguang tuparin ang kahit pinakamababaw na pangako. Ang masakit pa, ang mahihirap ang laging unang tinatamaan. Habang ang mga nasa poder ay namumuhay sa karangyaan, ang karaniwang mamamayan ay patuloy na nakikipagsiksikan sa gutom, taas-presyo, at kawalan ng maaasahang serbisyo.
Ngunit higit sa galit, may matinding aral sa likod ng tatlong taon ng pagkadismaya: ang boto ay hindi lang larong pampulitika—ito ay buhay ng bawat Pilipino. Ang isang maling boto ay maaaring magdulot ng matinding pinsala hindi lamang sa kasalukuyan kundi maging sa hinaharap. Ang tatlong taong ito ay naging paalala na ang hindi pag-aaral, hindi pagsisiyasat, at ang pagboto base sa emosyon ay may mabigat na kapalit.
Ngayong papalapit na naman ang susunod na halalan, nawa’y bumalikwas tayo mula sa ating pagkakamali. Hindi sapat ang magreklamo sa social media. Dapat nating yakapin ang ating tungkulin bilang mga mamamayan: maging mapanuri, matalino, at mapagmatyag sa pagpili.
Ang susunod na boto mo ay maaaring magpasya kung magpapatuloy ang pighati o magsisimula ang paghilom.
