Isang bahay-kubo ang natupok sa sunog bandang alas-8:47 ng gabi nitong October 14 sa Sitio Masipag, Barangay Limon Norte, Looc, Romblon.
Batay sa paunang impormasyon, pinaniniwalaang nagsimula ang sunog sa naiwang nakasinding mga basura ng may-ari ng bahay na si Jovito Liberato na nakalimutang patayin.
Ayon kay Sangguniang Kabataan official Edgenel Liberato ng Barangay Limon Norte, nakatanggap siya ng mensahe mula sa kapitbahay nhg biktima tungkol sa insidente kaya agad itong nakipag-ugnayan sa opisina ng Municipal Disaster Risk Reduction and Management Officer ng Looc upang humingi ng tulong at maipatawag ang mga tauhan ng Bureau of Fire Protection-Looc.
Ayon kay Liberato, naghahanda na umanong matulog ang dalawang nakatatanda nang marinig nila ang pagsigaw ng kanilang mga kapitbahay sa labas. Dito nila napagtantong nasusunog na pala ang kanilang bahay.
Walang naiulat na nasaktan o ibang bahay na nadamay sa insidente.
