Kumilos ang pamahalaan upang suportahan ang operasyon ng isang pribadong power-generation firm at maiwasan ang posibleng brownout na maaaring makaapekto sa libu-libong kabahayan sa Tablas Island, ayon sa Department of Energy (DOE).
Ayon kay Energy Secretary Sharon Garin, tinutugunan ng pamahalaan ang mga hamon sa operasyon ng Sunwest Water and Electric Company (Suweco), kabilang ang pagtaas ng presyo ng krudo at iba pang operational issues na nakaapekto sa diesel-based power generation.
Sinabi ng DOE na nakapag-secure na ang Suweco ng fuel supply na tatagal ng humigit-kumulang isang linggo, habang inaayos na ang karagdagang delivery upang matiyak na hindi mapuputol ang serbisyo ng kuryente sa isla.
Nagpatupad din ang pamahalaan ng koordinasyon sa iba’t ibang ahensya upang matiyak ang tuloy-tuloy na supply ng krudo at operasyon ng planta.
Nauna nang naapektuhan ang operasyon ng kumpanya matapos i-freeze ang ilan sa kanilang assets kaugnay ng isang imbestigasyon, na nagdulot ng pangamba sa suplay ng kuryente sa mga lugar na kanilang sinusuplayan.
Sa datos, tinatayang aabot sa 55,000 kabahayan sa Tablas Island ang maaaring maapektuhan sakaling magkaroon ng power interruption.
Samantala, sinabi rin ng DOE na magagamit ang pondo mula sa Universal Charge for Missionary Electrification (UCME) upang masuportahan ang operasyon ng planta at matiyak ang tuloy-tuloy na suplay ng kuryente sa mga off-grid areas tulad ng Tablas.
Patuloy ang pakikipag-ugnayan ng pamahalaan sa mga power provider upang maiwasan ang aberya sa suplay ng kuryente sa lalawigan.
Discussion about this post